...and come to be MURLEN...
---
\
MURLEN PLATINUM JUBILEE AH THU KIGEN PAWLKHAT (Behlapna)
Christian Suak Thu
Tedim gam Thalmual, Keizang, Muizawl, Suangzang leh Mualnuam pan 1920 kiim a Murlen khua lut Zomi te Murlen khua Hausapa Pu Saithuama Sailo leh a zi Pi Ngai Kang leh mi phatuamngai pawlkhat hanciamna tawh 1942 kumin a nungta Pasian biakna Biakinn phuankhia uh hi. Tua kum pen Mizogam ah Christianity a lut zawh kum 48 a phakna hi. Gospel puak masate in Haam ah Lai Siangtho hawm uh hi. Haam 3 oma, Pu Thual Ngin inn, Pu Sing Dai inn leh Pu Sawl Vai inn hi. Haam ah giak tangvalte in Lai Siangtho sim thei tam nailo ahih manin Ni Sagih Lai sin uh a, tua tawh LS sim thei uh hi. Tua hun laiin Leisanzo Khua pan Pasian thugena vialvak khat Pu Son Lang kici Murlen khua ah hong vaklut kha a, amah leh Hausapa hanciamna tawh Christian a kisuak hi.
Christian Suak Masa te
1940 kum in innkuana Christian suak masa Pu Son Khaw Hau hi a; mimala suak Lut Ngin, Thang Gen, Vai Za Dal, leh Go Khaw Nang hi [Murlen Vengpi Silver Jubilee laibu, January 1967]. (Pu Go Khaw Nang in Platinum Jubilee ah a thugenna ah 1938/39 in Christian kisuak in, Chuanhnuai, Lusei veng ah Biakinn ka zuat uh pen 1940 hi ding, tua sanah Sunday School ah ka min uh hong khumsak uh hi, ci in gen. A Christian suak lian uh leh SS ah amin uh a kikhum pen a kum kibanglo hih tuak hi. Silver Jubilee laibu ah SS ah min khum kum kigelh hi ding hi a, Christian a suah kum uh kigelhlo hizaw kha ding hi.) A kumthak 1941 ciangin innkuana suak inn 7 (Pu Vial Kho Zam, Pu Lal Zam, Pu Khai Kho Gin, Pu Kam Kho Zam, Pu Cin Khual, Pu Sian Zam, Pu Bel Za Gin) leh mimala suak mi 6 pha hi (Thuam Za Gin, Thang Za Do, En Kho Lang, Dim Man, Khai Lang, Ngaih Kho Lang).
Biakinn neilo
Christian suak masate biakinn neilo ahih manun Vengnuai ah kikhawm uh a, lusei pau lah theilo uh ahih manin kikhopna ah nawngkaina tampi tuak uh hi. Ni khat bang Pu Son Kho Hau leh a lawmte kikhawm dingin a pai uh leh Ninoni na hikha a, kikhawm lo in ciahkik uh hi.
Biakinn neita
Hausapa Saithuam Sailo hanciamna tawh ama inn lui teng sutuah in Biakinn khat 1942 kumin lamsak a, March 1942 in Pastor Thang Khum, Tualcheng in hong hi. Inn 8 leh mimal 12 khawng bek hinapi Sialtal khat tawh Biakinn honna pawi bawl uh hi. Vengnuai te in meivak khat tawh inntuan uh hi.
Tui Kiphum Masa Pen te
Biakinn hon ni in mi 4, Pu Vial Kho Zam te nupa leh Pu Khai Kho Gin te nupa tui kiphum a, Murlen pawlpi pan tui kiphum masa pente hi.
Makai Masa te
Biakinn hon zawh ciangin Lal Zam, Khai Kho Gin, Vial Kho Zam leh Thuam Za Gin te makai sem a, makai masa pente ahi uh hi.
Pawlpi Ngeina Tawh Kiteng Masa te
Mizogambup Gospel Golden Jubilee kum, 1944 kumin Pu Vial Kho Zam te nupa leh Pu Thuam Za Gin te nupa Tapidaw Pawlpi ngeina tawh kiteng a, Murlen khua pawlpi pan Tapidaw Pawlpi ngeina tawh a kiteng masa pente hi.
To Tuam Nei
Christian suak masa te pen tulai hun mah bangin tua hun laia Lawki ngeina Zu leh Sa tawh a kizol kik ciangin puk theizel uh ahih manin Tapidaw a suak peuhmah Lawkite ngeina u-sa, nau-sa, sung-sa, pu-sa cihte kisangtuah nawnlo ding ciin Pawlpi in khentatna a neih ciangin Pawlpi in kalsuan kik thei hi. Lawki in To Tuam nei, Tapidaw in To tuam nei ciin kisang hi. Lawki leh Tapidaw in Hakkol khat pua khawm thei lo uh hi.
Lawpna Hong Tung
1948 kum in Kha Siangtho ah lawpna lamna hong tunga, naupang lam pan hong kipan a, Suan Kho Lang leh Thawng Kho Lang in ngah masa uh hi. A kithei ngeilo tua bang lawpna hong tun ciangin Pawlpi kilingsak a, kithutuahlohna hong tungin Pu Lal Zam leh mi pawlkhat in UPC kici Tapidaw Pawlpi khat zui uh hi. Tua kiim in mi pawlkhat Lamka lamah tai in, mi kiam in, pawlpi bah mahmah hi. Pasian in thupha pia kik in Lawki pan Tapidaw suak innkuan hong kibehlap kik hi.
Pawlpi Upa Kip Masa pen
1950 Saitual Presbytery khoppi ah Pu Thuam Za Gin akip Pawlpi Upa leh Presbytery Member dingin kikipsak a, Upa masa pen leh Presbytery Member masa pen ahi hi. [Amah Rev. Dr. JM Ngul Khan Pau, Fuller Theological Seminary, USA pianna Pa hi. - HZC].
1958 ciangin Pu Neng Kho Lian (Suante Drugs Store, Aizawl neite pa, mah ahi na?) zong Upa kip leh Presbytery Member dingin kikipsak hi. Ahi zongin amau a kumkik 1959 ciangin Lamka lamah pemsan uh a, pawlpi mi kiam leuleu hi. Pasian in taisan lo in Pawlpi mi ding pia kik zel a, 1960 ciangin a kip Upa dingin Pu Go Khaw Nang (Rev. Dr. G.K. Nang u pa) leh Pu Awn Za Suan (amah pen Kawlpi a om pen hiam tel lian keng…a theite in hong behlap sak un), 1964 kum in Pu Khai Lian Nang (Dr. S. Neng Ngaih Lian nupi pa) kisang hi.
Kum 18 a phak pan Tualsung Upa a sem, kum 28 a phak pan Upa kip a sem Pu Go Khaw Nang (Rev. Dr. G.K. Nang u pa) pen tuni tannin a tenna Kawlpi ah Upa kip sem suak lai hi. Amah cidama, Murlen kum 75 cinna ah zong kum 80 phata mah leh hong kihel in thugenna limci tak hong nei thei hi. Thu dot taak leh thu ciamteh denpa ahih manin A’ na a sepsak Topa in a khan kumte hong sausak in cidamna hoih hong piaksak denta hen.
Naupang Nipi Sang Sia Masa
Pu Thuam Pau in naupangte a mawk om uh hoihsa lo in khawm a, la, lai, tangthu leh LS thu khawng hilh in pattah a, Naupang Nipi Sangsia masa pen ahi hi. Ama hanciamna tawh 1951 kum in Nipi Sanginn a tuamin kilamzo hi.
Pu Suan Khan Thang (Rev. S. Neng Za Khup pianna pa) pen galkap sung pan hong tawp ciangin Nipi Sang ah Superintendent sem a, a masa pen ahi hi. Ama makaihna tawh Nipi Sangsia Pu Thuam Pau, Pu Zen Kho Lang, Pu En Kho Lang leh Pu Lang Gin (Baptist Pastor Pension zo) te in sem uh hi.
Pu Suan Khan Thang in Nipi Sang ukpi sem bek hilo in naupang sangkah utlote, lai sim nuamlote zol in, ama sum tawh muamkhum khawng leisak, laibu khawng leisak cih bangin pattah a, ama hanciamna hang tawh Suan Za Go leh Khup Za Go (Rev. Khup Za Go, ZONET ah Carey Suante, Delhi ah Vaphual News nei pen pianna pa) in 1951 kumin tan 3 zo thei uh a, laisiam pahtawina sum (scholarship) zong ngah uh hi. 1954 ciangin Khup Za Go in tan 6 zo a, Murlen khua leh a kiim ah a masa pen ahi hi.
Numei Kikhop
Numeite zong omkhong tuanlo a, Nipikhawvak nitak in kikhop pan uh a, Nu Vial Khan Cing (Pu Sing Za Gin zi) leh Nu Niang Za Go (Upa Thuam Za Gin zi, Rev. Dr. JM Ngul Khan Pau pianna nu) in makaih uh hi. Pasal lam pan Upa Khai Lian Nang (Dr. S. Neng Ngaih Lian nu’pi pa) in hanciampih hi (advisor).
Numei makaite gel khat Kawl ah, khat Lamka ah a pem uh ciang kizomzoloa, June 1961 ciang in Upa Go Khaw Nang mah imakaihna tawh nupi bek hilo, nungak honkhat hanciam khawm in Numei kikhopna kizomki zo pan hi. Kikhop bek hilo in Numei kipawlna in Pawlpi ading na tampi semkhia uh a, Pawlpi kisap van tampi zong leisakzo uh hi. [Tuni tan in Numei Kipawlna in Pawlpi sung phungvuh den lai hi. –HZC].
Nungak Tangval Kipawlna
Mizogambup ah nungak tangval kipawlna YMA kici 1935 a kiphuat ciangin Go Khaw Nang Rev.Dr. G.K. Nang u’ pa), Thang Sian Gin (Rev. Suan Khan Thang, Executive Secretary, Zomi Baptist Churches Mizoram pa neute khat), Gin Za Khual (Dr. S. Neng Ngaih Lian pa’pi) te makai masa ahi uh hi. YMA nasep te – Khuakhal meikang ding veng, Misih ciang Kuul to, Tuahsia liam leh bai omte huh, Khualkhua pan cina leh misi a om leh pua, gammang a om leh zong, khuasung tagah meigongte huh, etc cih bang hi. Khuasung in noptuampih hi ding, tutanin “YMA khan lai pawh” ciin nupi papi in gennop sa mahmah uh hi.
Khangno Tapidaw Kipawlna
Christian Endeavour kici pen Khangno Tapidaw Kipawlna ciin kiminvawh a, makai masa Go Kho Nang, Neng Kho Lian leh nungak tangval pawlkhat hi. Vengnuai ah Kristian Thralai Pawl kici hi.
Tapidaw Khangno Kipawlna ah makai leh a hanciam den sanggamte pawlkhat in hong nusia baihlua ahih manin a gikzaw sem sep ding tavuan hong guan uh tawh kibang hi. Amau te: Gin Zam (1952), Vial Za Niang (1957), Vum Kho Zen (1958), Awi Nem (1964), Dim Kho Don (1964), leh Upa Neng Kho Lian (1965) ahi uh hi. A kha uh khamuangin Topa kiangah tawldam henla, a maban uh a zom ding Top amah in hong pia zel ta hen.
Thukhupna
Hih Murlen Vengpi Silver Jubilee laibu sung pan Murlen Pawlpi pen Kha Siangtho lamlahna tawh a kalsuan ngitnget ahihna kilang hi. Tua banga makaih Kha Siangtho ompihna hang tawh 1967 kum in Lungdam Puakna Pawi ciin Silver Jubilee Mualsuang zong naphut uh hi.
NB: Murlen Platinum Jubilee tawh kitonin tuma kum 50 val paita hunin Christian suahna hang tawh Murlen khua leh a khua mite tangthu tawm kong gelh khiat pak hi.
Laibu ette : Murlen Vengpi Silver Jubilee laibu, 1967, etc.
Hau Za Cin
Phuitong Liim
---
Hau Za Cin
to Zomi
show details 3:47 PM (6 hours ago)
Murlen Platinum Jubilee ah thugente – 3
Pu PC Vanlallawma, kum 88:
Murlen ah 1933 kumin ki kai a (kilut cihna, Lungpizawl ah ten masakna hi ding hi), tua kum in kei kum 11 a upa hi ing. French gam pai 1917 kumin Tullamun (Tumkhuai lui nak mualtung) ah khua kisat leuleu hi. Tua pan tu huna tenna Murlen kisat kik hi. [Lungpizawl pan Tullamun ah khua kisuanto leuleu cihna. Tua manin upa lamte in Murlen pen Lungpizawl khua cihin zong na ciamtehzaw uh hi. Lungpizawl pen Murlen khua gal keen nuai, suangpek lianpi khat om a, tuni tannin zong muh ding omlai, tua kiim ah teng masa uh hi. Tua kiim pen Vaimim leh Buh hoih mahmah a, tuni tan in zong lo dingin kikho zel lai hi. - HZC].
Murlen khua sat pen Kaihranga tapa Saithuama hi a, amau Sailo lal ahi uh hi. Khua a kisat ciangin Veng 2 om zel hi, Lusei leh Paihte, ahang pen nopni dahni zat dan kibanglo hi. Tua manin Hausapa in a tuamin veng hong bawlsak hi. 1943 kumin ko Murlen pan Hnahlan ah ka kik uh hi.
Murlen khua a kisat ding laiin Hausapa in Hnahlan a a vaihawmpih Upa hoih leh thanuam khempeuh tonpih a, Biakna upa zong tonpih hi, gentehna in, Ralzinga, etc. Biakinn neih ma in Pu Kapchhunga inn ah kikhawm ung. Tapidaw Pawlpi kilawp mahmah a, zong ka ki it mahmah uh hi. Nungak tangval banga a ki it hi mai ung. Val upa thu zong kizui, thu kimang mahmah a, a kamsawl uh kinial ngeilo hi. Bungmun ah Bungpi ana dam nawnlo, a na sih pen pawi kasa hi. Pu Hema in a suan Bungpi hi a, pammaih mahmah hi.
Murlen khua tangthu dang ka theih pawlkhat hih bang hi.
Murlen Khuasatte
Hnahlan pan:
1. Khawtinchhingi, Labuana Nu, Thanzama Pi
2. Chaltuahvunga, Keikhama Pu
3. Thanghrima, Rosiama Pa
4. Thangsuana, Chalthanga Pu
5. Lal Saithuama, Hnahlan Khua La
6. Suakngura, Laldongliani Pa
7. Lalkunga, Liantawka U
8. Lianruaia, Darhnuna U
9. Roliana, Nuntluanga pa
10. Khuangdaizova, PC Vanlallawma Pa
11. Taibawnga, Lalnghaka Pa
12. Thangkhuma, Thanthuama Pa
13. Thangchina, PB Lalzuithanga pa
14. Neuva, Lalthanga pa
15. Ralthanga, Sat hranga pa
16. Satzawna, Zangena pa
Vapar pan
1. Dengthuama, Sairuma pa
2. Ralzika, Zamawii pa
3. Saithuama, Engchhawna pa
4. Kapthuama, Satinmana pa
5. Kapchhunga, Keiliana pa
6. Ralzinga, Chalbuanga pa
7. Hrangdailova pa (Daikolha pa)
8. Vanbawia, Lalzuala pa
9. Thatchhingpuia, Laldawngliani pu
Murlen khua sat laia Tapidaw upa kipte
1. Upa Thangchina
2. Upa Roliana,
3. Upa Neuva
4. Upa Ralzinga
Murlen sat cillaia Lapawl makai Papianga, Lalpara pa hi
Murlen khua sat laia kum upa te
1. Chaltuahvunga, Keikhama pu
2. Darchhunkunga, Thuamkunga pu
3. Darzahluna, Engchhawnga pu
4. Thangsuana, Chalthanga pu
5. Salzatlingi, Chalthanga pi
6. Khawtinchhingi, Saiphunga pi
7. Lal Saithuama Nu
8. Thatchhingpuia, Laldawngliani pu
9. Kapthuama, Satinmana pi
10. Lalvungi, Laldongliani pi
11. Chawngruma pa
12. Hrangi, Lalkunga nu
Murlen Lal Saithuama khua pan Christian masate
1. Pi Bahralaii, Thuamkunga pi
2. Lal Saithuama, Murlen lal
Murlen khua sat cianga lo neihna gamte
Murlen lut ma kum in Hnahlan Dilhnuai kinei a, tua kum Favang lai takin Murlen gam ah kilut a, January 1933 in lo kivat a, lo kihal in, tua kum in Murlen ah kipem in, ki omsuak hi. Lo gam zuat dan hih bang hi: Zawlpui (1933), Kelchi gal (1934), Tumkhuai gal (1935), Tualpi lampi Buh minlo gam (1936) , Valukkhuai nuai, Lungpizawl leh a pam gam hoihna (1937), Traupi (1938), Bukpi mual Rabung tawh gamgi (1939), Tuithoh nak (1940), Arbai mual (1941).
Hih atungate Murlen omtung a khawsung nuntakzia tawm kong lah theihte hi.
Ka damrei hi ka va lawm em! Ciin tusuk kik hi.
Pu Thang Nang:
1945 kum in Lamka pan Football Murlen ah ka pua a, tua pen Murlen khua in Football ka neih masa pen uh hi. Football siam lakah Khawzathanga, Thangchhunga, Chhingzuala, Gin Za Go kihel. A siampen Gin Za Go pen Ngopa kual pan Aizawl ah kisui dingin kitelkhia hi. Pu Khup Kho Neng Tualpui khua ah football kimawlna ah a khe kitan, Murlen khua mipi in buaipih. Murlen ah kum 20 sung football ka sui a, captain ka hi den hi. Hnahlan ah Pitari Cup ka la uh a, hausapa tapa Pu Luauva in Sial thawh in Cup Lung ka phut uh hi. Pu Khai Lang in zong ka Cup lakte uh hong lopsak hi. Tua laia ka lasak tam pen uh leh la minthang pen, “He ni lawmawm hun tawite hi” cih la hi.
Traupui neih kum pen “Hauhpi Kum” zong kici hi. A kumkik ciangin Mautam (1959) a, Kialpi tung hi; ahi zongin Murlen kiallo hi, ahang pen a ma kum in buh kihau ahih man hi. Khuadangte Murlen ah antaw in hong pai uh hi. Ko zong Hauhpi kum in Silaizawn ka nei uh a, Pasian thupha hi.
Taimakna (Thanuamna) leh tumruhna (cihtak hanciamna) pen Murlen khua in a nuntakpih hi a, hih nuntakzia kemcingin mansuah ngei kei ni.
Pi leh pu mi hoih te tu leh tate mavangin daupai a, thupha ngah uh hi cih zong mangngilh ngei kei ni, ciin tu suk hi.
[Upate, khua nu leh pate in hong hansuahna te uh zahtakhuai, thupi in hoih thei mahmah hi. –HZC]
Thugenna tawh kisai tua zah hi phot a, a dangte zom lai ni.
Hau Za Cin
Phuitong Liim
---
Kum 75 tungsiah pahtawina laipi kipia te
1. Pi Nuzawni – 80
2. Pi Niang Don - 75
3. Pu Sing Za Ngin – 84
4. Pu Lalkailuia – 88
5. Pi Neih Thangi – 96
6. Pu Go Khaw Nang – 80
7. Pu PC Vanlallawma – 88
8. Pu Chhinghnema – 82
9. Pu Kapmawia – 81
10. Pu Gin Za Kap – 90
11. Pu Kei liana – 81
12. Pu Ding Lian a – 75
13. Pu Thatkhuma – 76
14. Pi Selkungi – 76
15. Pi Darmawii – 76
16. Pu Thang Nang – 76
Murlen ah mikhual haupen: Siapi Khai Za Dal, mikhual 24 nei
Mikhual upa pen: Pu Gin Za Kap, kum 90
Mikhual tung masa pen Pu Thatkhuma, Burma pan
Mikhual hong pai gamla pen Bu Do Pau, Nagaland pan
Kikhop sial a tawptan a tu den, upa pen: Nu Suang Do Kiim w/o Upa Cin Pau
Gan kigo: Sial – 2; Bawng – 1, Vok -5, Ak, Kel, Ngasa, etc.
Murlen khua pahtawina la:
Pu Go Khaw Nang, kum 80 phuah dawng 2:
1. Mimbang pianna vangkhua nunnuam,Khangsawnten zunzun leng e
2. A suan vui tangbang khang hen aw, Singgual genin thang hen aw
a. Vangkhaw khat a mimbang piang teng, Sian aw tuibang ciimsak aw
b. Sian aw tuibang cimsak inla, Mim leh sawmtang, lunta sesum lo sak aw.
Pu Nang Ngaih Lian, Murlen phuah dawng 2:
1. Pianna vangkhua kuam thuk mel neu, Simleitungah lawibang thang ta e
2. Vangkhua melneu gia bang zun ding, TT Sangte MLA taang bang dam hen aw.
1. Zomi vontawi Pu Rohlun aw, na khan kumkhua sawt hen aw,
2. Vaimang sesum na zek zagtam, philtang bang hawm siam ve aw.
Pu Gin Za Go,Aizawl phuah, dawng 2
1. Mimbang pianna vangkhua tutawm, Sian in gamgua bang hong hah a,
Gual tawh tan bang a kim hi hang e
2. Sian sinthu naubang I san man, Zalai lawibang thang hi hang e.
1. Murlen vangkhua ngabang bualna, Ningzu aisa a niangna mun,
Sian tong naubang I san man hi e
2. Sian tong naubang I san man hi, Gualtoh tan bang I kimna ding,
Thelnah nelzun pallawhna hi e.
Pu Hau Za Nang, Murlen phuah dawng 1
1. Kum sawmsagihnga a cinna, Murlen khua lam bang pak dih ve ni e
2. Phamsa thel bang tho thei hileh, Vabang lam pih nuam ing e.
Pu Lang Za Tun, Murlen, dawng 1
1. Pianna vangkhua lam bang pak ding, Ciin leh tuai I kim nam aw
2. Lengvan kaisa tuan pupate, Malzin bang ko nuam ing e.
Pu Pum Do Lian, Murlen dawng 2
1. Pu Saithuam leh Pu Hong Cin khawsat, Murlen khua ciin heikhawm e
2. Vangkhua pupa gamlei tuat leng, Murlen vangkhua nuam teivak cing e.
1. Sen puvon leh puvon khawsat, Sian in tuu bang ciing sang e,
2. Sianthu ciinna Murlen khua ah, Simlei kihei kim sang e.
Nu Cing Ngaih Ciang, Lamka phuah, dawng khat (Vapar khua kisat masa Murlen tawh a kigawm ciang khua omnawnlo pen a phuahna)
1. Mimbang pianna Partui vangkhua, Khisa’n lamtual in nei e,
2. Vangla pan ngal in don ing e, Zolawkta’n tau nan nei e.
---
