ZNC NO TO 2010 ELECTION

Why?
ZNC pen, 2010 Myanmar Gambup Kumpi Makai Ngeina kitelna ah bang hang in kihello?
---


Zomi National Congress
Head Quarters
Paidan Ding Theihsakna
July 01, 2010
Zomi U-le-nau, akuama peuh aw,
I party ZNC paizia ding, October 24, 2009 ni, ZNC kum 21 acin’ ni-in, leitungbuppi theih dingin Mikang pau in, zaksakna khatvei kong hawmkhiazo uhi. Tua pen leitung buppi’n I paizia atheihna ding uh deihna a, atom a, i tangkona ahi hi. Tu-in, Zomi peuhmah in, gamsung ah I om a, gampua ah I om zongin, teltaka I paizia I theihna ding deihna tawh, acing zaw deuh in ei’ pau in ong hawmkhia leuleu hi ung.
ZNC’ ngimna bulpi nam li hi-a, tua nam lite Constitution sungah I gelh zawhna ding: ngimna tawh 1990 kitelna a lut i hi hi. Tua kitelna pen, Constitution gelh ding kitelna ahih lam Galkap Mangpipa’ genna ah hi bang in, teltakin kilang hi. Galkap Mangpipa’n, “Tu-in i neih ngeisa Constitution nih om hi – 1947 Constitution leh 1974 Constitution: hite sung pa’n na deih zawkzawk uh tel thei, ahih kei leh no deih bangin athak gelh thei --- ko pen ka galkap len (barrack) uah ciah ding: ko tazakhan hi nuam lo,” ci-a siangtho taka ong genkhiatsa ahi hi. Tua mah bangin ZNC zong kitelna ah lut in, mipi’n ong tel hi. Kitel khit ciangin zong Galkap Kumpi’n 1/90 akici tangkona hawmkhia-a, tua sungah zong, MPte pen Constitution gelh dingte ahi uhi ci-in gen lai hi. Tua bang hi napi, 1993 pan kipan kum 15 sung Constitution agelhna vuah, MPte sehthum suah sehkhat zong phazo lo-in, Galkap Kumpi’ deihtelte bekbek in gelh ahih manin, ZNC ngimna bulpi ahi, I minpi Zomi mah a kilawh ding, I gambup kibelpawlna pen Federal Belpawlna hi ding, tua belpawlna tawh Democracy man taktak piang zo bek ahihna thu leh tua bang I kipawl ciang bek in, tangpi tangta’n suakta taka sumbawl theihna (Free Market Economy) thute nei thei pan ahihna thute kigelh khalo hi. Tua ahih manin ZNC’ ngimna kitangtun’ nailo hi.
ZNC’ ngimna akitangtun’ nailoh hangin, tu-a 2010 kitelpi ding pen tua ZNC’ ngimna bulpite tangtun’ theihna ding kitelna hilo-in, Galkap Kumpi’ thuneihna (ana/power) akipna ding kitelna hibek hi. Tua ahih manin Kihel Vetlo Dinga ong khentat hi ung.
Tua ahih manin, Zomi, gamsung gampua-a om, u-le-nau akuamapeuh aw,
HIh 2010 kitelpi ah i kihelloh hang in, nainganzi (politics) tawpsan (nusia) ding hi tuanlo hi hang! Ni dang (abeisa) sangin akhauhzaw, azai zaw leh athuk zaw in sem ding hi hang cih ong theisak nuam ung! Ko, asunga omte’n nasiataka kong sep zawhna dingun, no apua a om akuapeuh in huhtheih huhmawh in ong huh ong panpih un la, mi muhna ah pumkhat i hihna akilatna dingin, ZNC-LA, USA; ZNC- LA, Canada; ZNC-LA, Japan; ZNC-LA, Malaysia; ZNC-LA, India; ZNC-LA, Norway; ZNC-LA, UK cih bangin kizom le’ng ci-in ong theisak ung.
Zomi National Congress (ZNC)
Central Executive Committee

Zomi Tho in

Zomi aw Tho in
by; Thangbawi,
Pu Zauva & All


Nong thudot athupi khat hi.

Theih gige dingah hih Uital (SPDC) te pen mipi' gal (common enemy) ahi
hi. Tua hi in hihte' kiattheihna ding (or) thanemna ding nasepna
khempeuh ah ih panzawh tan panding ahi hi.

Asawtlo in lutol te hong diang leuleu ding aa tualai ah zong Zomite ki
ommawk tuanlo ding hi. Ommawk tuanding zong hilo hi. Hihte pen ih
pianken mawhpuak ahi hi. Kuama' sawl ngakding hilo hi. Sum tha lawhna
zong hilo hi. Pawlkhat in "Ei hun tung nai kei" ci mawkmawk hi. Nang
ei' hun tunciang om hamtang ding cih guarantee nei na hiam ? Cihding
himai inteh. Mi' khuta gul matsawm pen sila lungsim hi.

Karente tawh Zomi te'n tangthu ihnei hi. Zomi omlo hi leh Karen te'n
kawlgam auk lianding uh ahi hi. Tuni dongin akhasia omlai uh hi. Tu aa
zah sangin pahpih huai zawlai hi. Tua hileh bek khangsawn te'n agah
(thukkikna) na at nawnlo ding uh hi.

Zomi te'n ih galte akap theilo hile hang Manipur state ah Zomi om
nawnlo ding hi.

Tulaitak ihgal lianpen Uitalte mah hiphot hi. Uital om nawn kei leh
Talpakte zong ki mukha nawnlo ding hi. Hih uital suankhiatna ding vai
ah nasep ding tampi omlai hi. Emotional feeling tawh vakap pah leng ih
buisumh ding hi.

Athupi penpen ah kigingsa aa ih omding bek thupi phot hi. Thusau
ngaihsut kul hi. Pu Chin Sian Thang leh Pu Thang Lian Pau te' vaang
tawh Zomi Tedim Kampau te pen mikhempeuh in hong zahtak in hong pimuh
uh hi. Ahatpen ding in zong hong ki lamen ahih manin thu hong kuppih
tanghtangh uh hi. Amau' hongmuan zah in ei ih hi takpi hiam ? Zomite'
mailam ding Zomite' khutsung mah ah om hi. Zomi aw tho in !

Zogam leitung beidong kip hen !
Zokam tawh leitung beidong Pasian' Min kiphat hen !

Thangboi
Zangkong