Zomi le Pasian
Ngeina le Biakna Atomno Etkakna Part 3
II. Kha tawh kisai Zo minamte’ Upna
a. Tanglai Pasian le Zomi
Zomi te pen kha thu a um mah mah minam te ahi uh hi. Pasian zongh kha, dawi le kau te zongh kha mah ci in um uh a, mihing in zongh kha nei hi ci in um uh hi. Tua hi le a Pasian uh pen koi mun tak pan hong piang a hitam? Pasian/Pathian pen Zo pau khiatna in asiangtho Pa cihnopna hi lo ding ahih leh Sente (Chinese) ii Pa-hsien cih kammal mah pan hong pai a hi diam? Zo minamte zongh amin, apau, anneek, etc. te ah Chinese te tawh kibatna tampi om hi. Tua banah Zo mite pen Central Asia pan a Tibeto-Burmese minam khat mah ahih uh teh, Zo kumpi dynasty om ngei takpi ding hiam? Kawlgam Bagan hun lai in Thet (Sak) minam te pen Zo te dingin ki um mawh hi. Tua hi le Thet kumpi le biakna thu limtak a thei a om diam? Pyu te pen Buddhist ahihlam kithei hi. Zo te’n Pasian upna aneih uh pen Sen gam
pan Pa-hsien mah hi ding hiam? Tua hi leh Zo te’ Pasian/Pathian le Kawl te’ Paya kinai na a om thei diam? (Sing Khaw Khai in Zo Pasian le Kawl Paya kinaina a om in gelh hi. Zo People and Their Culture, 105-120). Kawl te’ Paya Thakhin pen Bagan Dynasty hun Raja Kumar khansuang tungah amasa pen in kimu thei hi. Kawl lai tawh lai kigelh asawt pen hun muhna hi.
Sen te in Christian God pen (Mattio Ricci hun lai missionary te lekkhiatna: Ming Dynasty hun lai) amau ngeina sung a Shangti min mah zangh kik uh hi. Ahihhang tu hun ciang in pawlkhat te’n Shangti pen Pasian min dingin deih pha nawn lo cih thu zong om hi. Tua Shangti/ Sangti le Zo te’ Pasian Siang pen pa, Sang pen pa kinai na om ding hiam? Kachin te’ Karaikasang tawh e le, kinaina om diam? “Ka Pasian na taii in, ka Lungzai na taii in!” cihna (Neino Tangthu) ah Pasian le Lungzai pen akibang mah hi ding hiam? Pathian pen Chinese Ti’en mah pan hi ding hiam? Sing Khaw Khai in Haka Lai pau Rung,
Tedim pau Lungzai, le Chinese pau Lung te pen akibang hi a, tanglai Gulpi cihnopna in gelh hi. (Zo People and Their Culture, 108-109) . Tua hi leh Zo minamte’ biak pen Gulpi hi mawk ve maw? Lungzai in hong siam thei, Khuazing in hong siam thei cih upna le biakna himawk ahih teh. Neino Tangthu sungah bel Pasiante unau in saliam sangin miliam gup ding khensatsak a, Pasian pen mihing agum vanglian khat ahihna kimu thei hi. Zo minam te tanglai a alai uh ui in nektumsak mawk ahihmanin Pasian thu ki gelhna bangmah kinei lo a, sangmangte’ hong bawl sak laisimbu te ah tanglai Pasian thu ki mu thei pan hi.
b. Pau Cin Hau’ Pasian le Zomi
Pau Cin Hau in Pasian pen van le lei piangsak pa Supreme Being in hong tangko khia a, dawi biakna thoihna te pan in Pasian biakna ah Zomi [Tedim Gam] te makaih hi. Laipian biakna pen Zo ngeina sung mah ah Pasian biakna cih ding ahi hi. Zo zu zong dawn thei hi. Tedim gam sungah mi 26,000, Falam gam sungah 9,700 convert cih mawk pen Pau Cin Hau Movement khauhpai mahmah ahihna kimu thei hi. Tua ahihleh Pau Cin Hau’ Pasian pen sangmang missionary te’ Pasian mah tawh akibang ahidiam? Pau Cin Hau in Zo biakna sungah ahibialbual upna le zek teng nusia in Pasian khat bekmah biak ding hong suah hi. Siangsak mahmah hi. Tua manin Zomi te in tua biakna zui nuam hi thei kha ding uh hi.
c. Missionary te’ Pasian le Zomi
Missionary te Khamtung Zogam hong tun’ uh ciangin, bang hangin Christian God pen Zo minamte’ Pasian/Pathian tawh hong introduce uh hiam? Min dang te ahi: Lungzai, Khuazing, Zinmang, etc., te bang hang in zangh lo zaw ahi diam? Tua hun laitakin Pau Cin Hau’ Laipian Pasian pen Zomite’ sungah kisang siam mahmah ahihman hi kha ding hi. Sangmangte’ sung pan pawl khat (e.g. Dr. East le Dr. Cope) in Pau Cin Hau pen Pasian’ tapa hong pai nading lampi asial khol ahi Tuiphum Zaw Hang bangin ngaihsun uh hi. (Robert G. Johnson: 400). Dr. East lai khak (Johnson kiang) sungah: “Pau Cin Hau pawl te’n Jehovah Pathian kiangah thungen uh hi.” [Johnson: 208] ci hi.
d. Pasian, Zinmang le Khuazing
Missionary te in Zo minam tuamtuamte’ ngeina sungah upna le biakna te hong kaltel khittak uh ciangin Pasian/Pathian pen Zo mi te’ Supreme Being in hong telkhiatsak in, Universal God in hong biakpih ta uh hi. Adangdang te ahi Zinmang, Khuazing, Lungzai, etc, etc, te pawl pawl pen personal god tuamtuam dan in hong ngaihsut sak hi le kilawm hi. Dawi le kha gi lo atuamtuam te pen bel gen vet ding hi nawn loin, Pasian khat bek mah bia ding, thumang ding, cih te lamah hong kalsuanpih to cih ding ahi hi. Tua ahihmanin, Zo minam tuamtuam te in Nipi ni pen Sabbath ni in ngaihsun in tang uh hi.
e. Pasian le Zo Ngeina
Missionary te in Christian sungah zu ne [dawn] thei lo ding; Sunday ni pen nipi ni in tang ding cih thukham or thukhun tawh Zomi te pantah to ahihmanin Zo minam Christian te in nipi ni pen Israel te’ Sabbath tan’ in tang uh a, Christian ahihna pen zu neek lohna tawh lak uh hi. Karen evangelist te tung tawn in convert uh ahihmanin kawl pau zangh uh a “Tapidaw” le “Lawki” ci in kikhen uh hi. Kawl pau pan Zo pau ah transliteration abawl hi a, Zomi te’n akhiatna zongh a telcian mawk na uh diam? cihnophuai hi. Zomi te in Zo ngeina sung pan in hong pusuak uh a, Christian ngeina sungah hong lut uh hi. A ngeina uh nusia in midangte ngeina zui ta uh hi. Asanggam Kawl te in Sengam laizang lampan aken uh angeina lui te uh nusia in midang ngeina ahi India te a leh Thai te a azuih
kawikawi mah bangun, Zo Minam te in zongh angeina lui uh nusia in Mikang Christian te ngeina sungah abiakna uh hong khelta uh cih ding ahi hi. Zo minam te lah ah Christian le ngeina lui kilamdanna pen zu ne le zu nelo hi lian hi. Zu ne te lawki [azak ngei loh uh kammal, akhiatna zong athei mawk uh tam, tu ni dong mah zangh lai ve un] ci uh a, zu ne lo te tapidaw ci uh hi. Tapidaw cihin Zo pau in khiatna a nei diam? Tapidaw biakna thak sungah ngeina lui a hi zu le sa, ki le khuang; Zo ngeina lamna, khuang tum, dak tum, etc., te pan kipan laphuakna, lasakna, etc., ngeina hoih no no te khempeuh pen Lawki ngeina ci in dawi biakna tawh kipawl sak ta uh a, nusiatpi in nusia ta uh hi. Midang te in Christianity pen angeina sung uh ah khangto sak ciat uh hi napi in, Zo minamte in Christianity sungah angeina lui uh nusia in midangte ngeina teng zui kawi kawi mawk ta uh hi.
III. Mihing Kha le Sihnungah Nuntakna
[Human Spirit and Life After Death]
[ Zom to lai ding, zop ding tam mahmah lai…alunglut t’a ding…alunglut te’n hong kuppih ta un. Lungdam hi.]
Suanpi
Philip Cope Suan Pau
ARMS: All Racial Mission & Theological Studies
Yangon, Myanmar
------------ --------- --
The United Graduate School of Theology
Yonsei University, Seoul, Korea
Website: http://myanmarmissi ons.talkspot. com
Tel: 82 10 7509 8001
