Minam A Tawisang Zomi Naupangte
Malaysia gam ah, Zomi mimal ih tam semsem mah bangin, numei-naupang zong kitam mahmah ta aa, a tawmpen in a kisim ciang Zomi naupang kum (18) nuai bekbek (1500) bang phading in ki lamen hi.
Malaysia aa Zomi-te dinmun ih theihtek mah bangin, naupang khat ii lungsim pumpi suahtakna leh naupang khat ii lungsim thalawp pen ahi lawm leh gual tawh gualnuam theithei aa kithuah theihna ding pen, ih dinmun in hong pia hetlo gige hi. A makai ding sia, sianute leh nu leh pate-in zong, tuabang hunnuam tuamtuam ih vaihawm sak ding pen haksa mahmah hi.
Galtai-gambel leh cimawh dongtuak aa om naupang tampi pattahna lamah a minthang leh a picing Harvest Training Centre (HTC) te ii vaihawmna tawh, tukum naupangte Tukpeng leh Netball kidemna pawipi-ah, a beisa kum bang mahin Zomi naupangte aa ding zong lampi hong hon’ sak leuleu uh hi.
Faisal Cup ci-in hih pawipi pen, a kum lina aki bawlna hita aa, 2008 sungin zong Zomi naupangte-in gualtung tuan’na va lakthei uh hi.
Faisal Cup 2009 pen October 3, 2009 ni-in Pusat Kecermanglangan Sukan Cochrane (Pudu) ah nopci takin kibawl thei hi;
- A kimawl Team vekpi (46)
- A kimawl Mimal vekpi (426)
- Volunteer nasem vekpi (240)
- A thapia mimal vekpi (700)
Tukpeng (Pasal) lam ah, U-18, U-16, U-14, U-12, U-10 ci-in kum phazah tawh khen in, nam (5) bang omsak uh aa, Netball (Numei) lam ah, U-18, U-15, U-12 ci-in kimawl kidemna nampi nih pha hi. (‘U’ cihpen mangkam ‘under’ cih a tomlawhna hi aa, kum tuazah nuaisiah cihna hi.)
A vaihawm HTC te sapna om mah bangin, Zomi Education Council (ZEC) min tawh Zomi naupang (37) in Team (4) ah kidemna va ki neithei hi; Tukpeng (U-16, U-12, U-10) leh Netball (U-12)
Hih pawipi-ah kidem dingin sapna aki ngah aa kipan anuai aa makaite veina leh vaihawmna tawh kisin hun kha khat val sung hanciam takin ki neithei hi;
Tg. Thawng Sian Kham, Tg. Cin Sian Mung, Tg. Pau Mung, Tg. Tuan Go Pau, Tg. Thang Suan Piang
Vaihawm haksatna tampi sung pan Zomi naupangte va kihel zawhna dingin, ZAM sum bulpi pan leh palaite-in, a kisam sum leh paite hihzawh zahzah tawh ma pangkhawm uh hi.
Hih Faisal Cup 2009 pen, Zomi naupangte-in anuai aa minam tampi, kipawlna tuamtuamte mai-ah ih minam min a tawisan’ theihna dingin, Malaysia aa om kipawlna kim a kihelna pawi khat ahi hi; HTC (Harvest Training Centre), Hilla (Afghan Students), BRO (Burmese Refugee Organization), MEC (Myanmar Education Center), KRC (Kachin Refugee Community), Abim (Rohingja Students), CSO (Chin Students Organization), R-Kids (Roma Shelter)
Faisal Cup 2009 Tukpeng & Netball kidemna-ah, Zomi Naupangte Team (4) kiding thei aa;
U-12 Netball: Champion
U-12 Tukpeng: Champion
U-16 Tukpeng: 2nd Runner Up (A thumna)cih bangin gualzawhna Cup te leh a kimawl khempeuh in Medal khatta tawh lungtai takin innlam ki zuanthei hi.
U-12 Tukpeng Champion pahtawi piakna-ah Cup leh Medal te hong piaksak UNHCR Ulian pa tung ah zong ih lungdam deuhdeuh hi. (Hih pawi vai-ah, UNHCR panin RM5,000 tawh ma pang uh cih zong kiza hi.)
Pawi hun sungin, FIFA (Leitungbup Tukpeng Kipawlna) ii Malaysia palai pa leh USA Embassy Uliante in zong thapiakna neithei uh hi.
Kimawlna pawi sungah, Kampu (Laizom Media) in hoihtak in video hong laksak aa, VCD (45 minutes) zong ki puahpha khin hi. Bek thamlo-in, leitung mun tuamtuam pan ettheih dingin internet/youtube ah ki khahkhin hi. (Anuai aa link te-ah na etsak un.)
Hih bangin, ih minam min, ih hihna leh ki-itna, na sepkhoptheihna, hanciam khop theihna, thuakkhop theihna, lungdam khop theihna, khat leh khat ki thapiak theihnate, thungetna ngiattawh ma a pang tangtang thei a etlawm Zomi naupang khempeuh tung Pahtawina Lianpi ih pia hi.
iNFO
Zomi Children & Faisal Cup 2009 (Part 1 of 7)
http://www.youtube.com/watch?v=W9G6bag8AIQ
