Tuesday, September 29, 2009

Pa Langh Sawm Mang

ZOLAI SIAM, LAI AT SIAM MAHMAH, ZOLAI TAMPI TAK A GELH; PA LANGH SAWM MANG GUALNAM
===
Zomi a kua maciat:

SDA Pawlpi makai khat Pr. Langh Sawm Mang Gualnam in September 27, 2009, ni tak nai 3:30 (MST) pawl aa a tenna Yangon khua pan a hong nusiatna hang in ki dah mahmah hi. Sia Mang peen Kapteel khua aa Pu Tual Thawng Gualnam ii tapa khat ahi hi. Khangno mahmah pawl khat leh SDA pawlpi sung aa a lut thak pawl khat cih loh buang Pr. Langh Sawm Mang or Sia Mang a thei lo Zomi SDA pawlpi mi om lophial ding in ka um hi.

Sia Mang in a hong nusiat peen SDA Pawlpi mite bek hi lo, Zomi a kua maciat ading in supna khat ahihmanin Zomi a kua maciat ii sim theih ding in net tuamtuam sung ah ka theih khak sun ama thu tomno khat iin hong theh khia ingh. Gelh khialh leh a kicing lo a om leh nong telsiam nang un hong thuum masa ingh.

Sia Mang in Cikha, Tedim, Tonzang, Singunau, Maymyo, Moulemein leh Yangon khua te ah SDA pawlpi khantoh nading in a sep theih zah iin hanciam aa a mapang khat ahi hi. Sia Mang te innkuan tawh ka kithuah masakna peen Tedim khua aa Assistant Pastor aa a hong om akipan a kithuah khawm toto ka hi uh hi. Pr. Kip Za Nang peen Senior Pastor aa a hong om laai tak aa Sia Mang peen Assistant Pastor aa a hong om ahi hi. Sia Mang in Cikha ah evangelist ding iin a na sep kipan hi. Tua pan Tedim ah Assistant Pastor, Tonzang ah church pastor, Singunau sang ah Principal, Maymyo Section (Mission) office aa Department tuamtuam te ah a hunhun iin Director pan mun len zel, Yangon ah Voice Of Prophecy School Principal, Southeast Mission, Moulmein ah Mission President, cih bang iin SDA Pawlpi sung ah makai lutang iin mapang kawikawi hi. Sia Mang' thu ka ngaihsut khak sim iin Sia Mang leh a nuai aa thu thum teng ka gawm khawm kha den hi.

1. Khangno te ading a deihsak mahmah Sia Mang
Kei mimal ii phutkhakna tawh kituak iin pawlpi sia ka kithuahpih khak khempeuh lak ah khangno te a ding a deihsak mahmah phadiak khat hi ci in ka ciamteh hi. Ka tel lian nawn loh hang iin 1970-1977 kikaal sung pawl iin Tedim ah a hong om uh hi. Kaal sim iin MV (Missionary Volunteer) tu hun iin AY (Adventist Youth) a kici khangno kikhop hun hong neih pih tawntung aa tua kikhop sung ah MV honors ci aa club tuamtuam Friends, Companion, Adventurer, Guide, Master Guide, ih cih te a banban iin hong matutpih iin tua hun aa Tedim pan aa a khangto SDA khangno te iin ih pawlpi thu leh Pasian thu kithei tuam mahmah hi. Ama hanciamna hang iin SDA pawlpi leh khangno te khangto khanghlo tuam mahmah uh hi.

2. Aw hoih iin la a siam mahmah Sia Mang
Sia Mang peen la siam mawkmawk bek hi lo iin a aw ngaih, aw lian leh awpi nei iin amah tawh la sa khawm leng ei zongh la siam khat a kisa thei phial khat iin hong om sak thei hi. Sia Mang peen la kin leh la siam khat ahih zah khat iin a khut tawh a gelh ngiatngiat, tonic solfa leh a tah khempeuh hoih tak aa a cing aa a tei la bu tampi nei hi. Tua hun laai te iin solfa tawh a kibawl tu laai aa ih ZBC la bu te zongh om nai lo iin Tedim la bu neu kiukeu, solfa kithuah lo te bek Zo mi te in ih neih ih zat hun laai ahi hi. Hih ZBC la bawlna leh puah phatna te ah zongh Pr. Langh Sawm Mang mapang mahmah hi. Kei zongh solfa siam nuam leh la ka siam loh hang in la sak a uuk khat kahihmanin Sia Mang kiang pan a la bu te kawm iin solfa leh a tah tawh Christian la tuamtuam te ka khut tawh tei ngelhngelh iin sin zelzel kahihmanin tonic solfa tawh la hoih tak ka sak theih peen Sia Mang kiang pan ka ngah pilna khat ahi hi. Hih thu hang in Sia Mang tung ah ka lungdam mahmah hi. Sia Mang te innkuan Tedim ah a hong om sung iin Church choir hong neih pih den iin pulpit gei ah Church Choir seat ci iin tutphah sau nih or thum kikoih den ahi hi. Sia Mang hong makaihna nuai aa Lawibual (Tedim ) SDA Church ah kum 10 khawng ka phak laai akipan church choir ah kihel den iin tenor a sa den ka hi hi. Kei bek hi lo, khangno numei pasal tampi tak iin Sia Mang pattahna hang iin siamna a ngah om ding in ka lamen hi.

3. Laisiam iin lai tei siam mahmah Sia Mang
Sia Mang in leitung aa lai tan saang pi pi nei lo hi ci lengg khial iin ka ki um kei hi. Taungo, Kyauktaing, pan tan 10 a zawh khit ciang in Myaungmya SDA Bible Seminary pan kum 2 course tawh sia a sem khat a hi hi. Ahizongh'n Sia Mang zah iin lai tei siam SDA pawlpi sung ah om nai lo kha ding hi. A siam a om zong in Sia Mang bang iin a siamna a zangh khat zongh om nai lo hi ci lengg kikhial lo ding hi. Sia Mang in kha 3 hal sim aa a ki bawl Sabbath School lesson khempeuh, a nuntakna a bei ni dong mah a tei ngelhngelh ahi hi. Tua bek hi lo iin Christo Kiang Zuatna (Steps To Christ) akipan lai bu tuamtuam te leh Adventist La Bu cih te khawng tampi bawl khia hi.

Hi bang aa a pawlpi a khantoh nading a kin, a hanciam, Zomi khangno te a ding a deih sak, Zomi Literature ah contribution tampi a nei Sia Mang (Langh Sawm Mang) in a hong nusiat na hangin Zomi SDA pawlpi mi te hi ta leh Zomi bup adingin supna lian pi khat ahihmanin ih dah mahmah hi.

Lai gelh,


Mungno (Gin Sian Mung Gualnam)
Riverside, California