Malaysia Zomi Nam Ni 2013 [Dr. Hau Za Cin]

Malaysia ah Zomi Nam Ni nuam mahmah - 1

Leitung mun tuamtuam ah Zomi Nam Ni nuamtakin kibawl ziahziah hi cih i zak ciangin i lawp semsem hi. Tua mah bangin Malaysia khuapi Kuala Lumpur ah zong Zomi Association of Malaysia (ZAM) te makaih tawh noptakin kizang ziahziah hi. Kei zong va kihel thei ka hih manin angtang ka kisa a, nuam kasa mahmah hi. Hua gam ah Zomi huazah om hizen maw cih ka muh ciang ka cimul hong tho liang hi. Lungdam ding maw kap ding! Piangsakpa theihloh in a piang khatzong omlo hiven maw. Khasia kei ni maw... Zogam hong paal ding hi!

Tukum KL ah Zomi Nam Ni thupi mahmah ding hi, hong siim phei vevua ciin lawmte in hong gen uh ciang kei zong a kigengen Malaysia ah Zomi omte mu nuam mah sing e maw ka ci hi. Kumthak zanga ka pai laiin Zomi Christian Fellowship, Canaan bek ah kikhawm man ka hih manin tua sunga kikhawmteng bekbek zong ka khua vua koh pawlpi mi sang tamzaw khin hi. Tua ni in Sia Huam tawh kimu khalo lai, amah lah tutung ka zin uh ciang lah US na tung khin leuleu. Lawmte in Malaysia ah Zomi tam mahmah hi in va en phei in hong ci den uh himah leh ka pai man ngei kei hi. Tua manin tutung pen a hun hoih khat hiding ciin ka hanciam tentan hi. Ka tun phei takpi leh ka upmawh sangin mi na tamzaw thamtham takpi a, lamdang kasa takpi hi.

Pu Chin Sian Thang tawh kimu: Zomi Nam Ni zingsang tungin Zinmang Pu Chin Sian Thang, President, Zomi National Congress (tun ZCD ciin kilaih phot) tawh kimu masa nuam hang e ciin a zintunna lam ka delh uh hi. Pu Thang tawh ka kimuh ciang mi thupi ahihna a kammal zatdan leh a mi hopih dan pan ka tel pah hi. Ka min, ka nu leh pa, ka khua, ka sangkahna, ka nasep cihte hong dong masa a, ka khanna thu a theih ciang kei kua bang mi hiding cih hong tel pah ding hi. Tua pen mipilte in mi maizum thei, mi zahkaite a maizum lohna ding, a maingalna dingin a hopih masak dan uh a ngeina hi a, a ban khempeuh pen kum tampi, hun tampi a kikhawl banga kiho theihna ding, kikholh theihna ding a kizopna bulpi kipatna hi. Mikangte in 'ice breaker' ci uh hi. Mi thupi te tawh kikholh, kimuh, kiho ciang hong thei ngei takpi, hong ngai mahmah khin ngei bangin hong maingalsak thei uh hi. Ei zong mi thupi, mi lian, ahih kei leh mi it mahmah, mi ngaihngaih mah kibang pah hi. Tua hi a, milian, milal, mithupi, mipilte tawh kikholh nuam kasa hi :)

"Pu Thang, cidam in i kimuh theih ka lungdam. Koh na pai masa nung in a mun ah kimu ni maw," ciin ka paisan sawm uh leh, "Na khawl phot sin, Zomi Mawtaw tawh hong kipui ding makaite in ci uh hiven, noh zong hong zui suak pah un," ciin hong khoh a, "Hilo e, noh hong pai un, koh ahi thei bangin na pai nung, noh mawtaw hong zui zaw un," ka cih teitei hangin ka nialzo kei hi. A sawtlo in Zomi Mawtaw, Zomi te tuanna dinga lusu manlo lianga Japan te bawl khat hong tung kheukheu a, inntual ah hong kidawh in a kongkhak hong kihong keukeu a, Pu Thang nungah ka tuang pah uh hi. Pu Lian Za Go Hatzaw in ama mawtaw ah koh hong tuangsak in amah khe tawh a ciah ka mitkha ah hong kilang hi. Tan 10 ka zawh a Lamka ka zin laiin Bethany School lam ah kikhopna khat om a, kikhop tawp ciang Pu Lian Za Go in ama tuanna Car hoih mahmah tungah koh zin teng leh numei teng hong tuangsak a, amah leh a lawmte khe tawh Siapi Kam Za Mung Buansing  te sanginn Bethany School gei pan New Lamka dong khe in a ciah uh hi. Hamphatna hong ngahsak mipilte ngaihsutna leh a lungsim itna uh thupi kasa hi.

Zomi Mawtaw tawh Zomi Nam Ni zatna mun tung: Zomi mawtaw tawh tai kiaukiau in Zomi Nam Ni zatna ding mun Chinwoo Stadium ('Cing-Uu' cih ding) ka tun uh ciangin kongtual ah ka tuak uh hi. Mawtaw kongkhak a kihon bektak leh Zomi Nam Ni committee pan Zinmang dawn dinga kisehte in Pu Chin Sian Thang leh a nungzuiteng kongtual ah na dawn pah uh a, pakkual na awksak pah in, a paina ding lampi na hong in, a tutna ding mun lam manawh in na paipih pah uh hi. Pu Thang nung zuiin koh adangte khempeuh zong ka tutna ding lam vuah hong tonpih uh a, Usher te in Zomi Nam Ni ciamtehna Vaphual nupa lim ka puansilh tung vuah hong belhsak uh hi. Zomi Nam Ni celebration committee te leh tutphah hawmte (Usher) kizen kasa a, gelsiam, ngaihsun siam kasa hi.

Zomi Nam Ni zang dinga hong pai peuhmah Zomi Nam Ni ciamtehna vaphual nupa lim suanglo omlo dingin kongkhak ah tanu (Usher) te in na pia pahpah uh hi. Kongkhak ah Zokhi, Zodial, Zopuan, Zonik, a tuamtuam Zomi van deihdeih lei theih dingin na kizuak pah a, tua zong gelsiamuh kasa hi. Tuni Zomi Nam Ni bawlna mun pen Chinwoo Stadium ('Cing-Uu' cih ding; 'Ciin-Uu' hilo in; Chin (Cing) = fine, hoih, siamnel; Uu = martial arts, wushu cih a wu pen hi) ahi hi. Chinese (Mandarin) kammal hi a, Fine Martial Arts Competition Stadium cihna hi. Zomi te theihsiam theih dingin Kungfu siamte kidemna phualpi inn cihna hi. Chinese kungfu siamte kidemna innpi cihna hi. Tuhun ciang Football stadium a om bangin nidangin Chinese te in Kungfu stadium, Japan te in Sumo kidemna innpi na nei uh hi.

Hih innpi sungah mihing a tawmpen 2500 bang nuamtak in a tu thei dimdiam hi. Kongkhak pan ka lut uh ciang innsungah mipi na dim zihziah ta uh a, paina ding lampi zong tanu te in hong honsak hikei leh mipi dim khin hi. Ka khuadak pheiphei leh Zomi hizah om hitazen maw ka ci a, lamdang kasa semsem hi. A gei khempeuh zong mipi dim, mipi lutna leh pusuahna lampi khempeuh zong mipi kigaklua ahih manin lawt khia khin hi. Tua manin a tu thei teng tu, a ding thei teng din theihtheihna ah ding cih bang hi a, a sungah a kitalo a pua lam ah mi za tampi mah omlai hi ciin tanu te in a nungciang hong gen uh hi. Zomi bekbek 3500 pan 5000 kipha ding cihna hi. Nasep neih hangin hong kihel theilo tampi om a, mun gamlat manin zong hong pai zolo mi tampi omlai hi, kici hi. A vekpi in kipai thei hileh mihing tuazah thum bang kipha lai ding cih hi. Hong tungtung omlai... nuam ei Zomi!

Lengtong Lasiamte tawh tukhawm: Tanu te in zinmang Pu Chin Sian Thang nungah hong tonpih uh a, ka tutna ding uh hong lak uh hi. Ka gei ka et leh Zomi lasiam Lengtong Kam Khen ka gei ah a Cowboy lukhu vom (Sia Khual in UK pan a puak pen ahi tam) tawh na tu bilbel hi. Bilbel ka cih ciang a lukhu vom mel ka gennopna hi. Amah bel a ngo lamsang hizaw pian, a lukhu tawh teh in! Ka veilam ah Lengtong Pauno sangnaupang thumangte omdan in a khutzep in na tu a, zingann ne khin hingeingei ding cih ka um hi (a gil kial mahmah kei leh kilawm kasak man hi!). A pam sawn ah Sia TS Khai mit limlang siang sitset khat thuah in na khuadakdak a, zon peuh nei ahi tam ka ci giugiau hi. Ka gei a tu Pu Chin Sian Thang in a vei a taka tute a khutlet khit ciang Zomi Association of Malaysia makapi Sia Nang Khan Pau in Vaidawnna Thugen a gen limtak ngai in tu hithiat ahih manin kei zong ka kim ka pam dak nawnlo in thugente dinna stage tung lam ka nga suak pah hi.

Tanute in dawn dingin tuisik thawl khat ciat hong pia pah uh a, tuate ka dawn leh ka gei ah phitsa in a ging khatvei ka za a, a gim hong nam pian, namtui veuveu ahih manin ka khuadak leh Pu Lengtong Kam Khen i Red Bull hon ging leh gim na himawk hi. A maigual a tu ciatciat i tui dawn a gim, a mel kibang kei tak ei maw ka ci man phial hi... he he he... Amah zingsang ann ne manlo a Zomi Nam Ni music etpih dinga tung baih na hileltak a, a limzaw a dawn ding mah hi ka ci uh hi! A lukhu vom lakhia zel, khu kik zel, a khe thuap zel, lakhia kik zel cih teng tawh stage tunga hun zat zong hong kizomzom a, nuam semsem in, kilawp semsem hi.

Kongkhak ah mipi hong tung ziahziah lai, stage tungah hun zatna zong a kipan taktak ding hita hi... nop panpan ei...

---

Malaysia ah Zomi Nam Ni nuam mahmah - 2

Ka gei a Pu Kam Khen Red Bull gim in ka cilphulsak mahmah, stage tunga Zongeina kilak te in ka cilphulsak sem.

Hunzat makai Rev. Suan Cin Hau in siamtak in hunzang dingte hong sam ziahziah a, a kilawm hun khat in mipi tel dingin hunzang dingte leh a hunzatna hang uh hong gen setset a, kitel mahmah hi. Hunzekte siam peuh leh mipi in kuakua a ding zongin a hih ding uh thei, a gen ding uh thei, a sak ding uh thei hi. Tua in hunzat nuamsak a, kicim manlo in kizom deudeu hi. Kipatna dingin mipiin "Lunglaulo Aw" cih la kisa ziahziah a, tua khit ciang Rev. Thawng Ngaih Khup in hun leh vaite khempeuh Topa tungah apna hong nei hi. ZAM President Nang Khan Pau in tuni a Zinmang Pu Chin Sian Thang vaidawnna leh tuni a Zomi Nam Ni zang mite khempeuh muakna leh vaidawnna thu gen in "Note khempeuh nong pai uh ciang i vai a picing pan, i vai a lawhcing pan hi," ci hi. Zomi te i paikhop, i kihel ciat ciangin Zomi Nam Ni a lawhcing pan ahi takpi hi.

Phit Lam: Zomi Education Centre pan in Zongeina Phit Lam hong lak uh a, etlawm mahmah hi. Galmat samat ciangin kipahtawina leh kivaidawnna in zong akizang Zomi Ngeina Phit Lam pen a hun tawh kizui in a phit zong kilamdang hi cih kimu thei hi. A hun tawh kizui in phitte zong a tuam deuh hong kizang a, kizepna puante zong Zopuan etlawm tak in kibawl vive ahih manin khanglui i pupa te hunlaia sabeng puan, gamvak puan leh pheituam te tawh kibang nawnlo hi. Namsau (sword) tawh a lai ah a lamding zong a mi a om hangin a namsau ding omlo ahih manin alluminium foil tawh a kituam gua tawh kisui temsau khat kizang ziau hi. A namsau taktak a nei ki om in, kizang thei leh nakpi takin etlawm zaw kan lai ding cih ka um hi. Lam ahih ciang a lasate aw kiza lo thei zel a, hithei hileh a lasa ding microphone tawh a gei ah numei 2 leh pasal 2 bang ding pah vet in amau a lasak huh dingin a lamte in zong a lasak uh sa veve ding. Tua hileh a la mipi in kiza dinga, a lam zong kimu ding hi. Khuangtumpa in microphone tawi kawma lasak tawh a thuah pen a siam mahmah manin a khuangtum khial vetlo hi. Zomi te siamna zong khut khempeuh tawh nasep tuamtuam khatvei in a sem thei hizen ve hang aw, Michael Angelo a gen uh bangin.

Ton Lam: Ton Lam zong nasia tak in Tonzang Lawm te in hong lak uh a, mipi in khutbeng ziahziah in kipahtawi hi. Zomi te pen pupa khang ah zong a madawk ding, a thupi ding, a cithei ding na kidem uh hi. Zomi te kidemna pen a hoih lama kidemna hi a, a kidemna peuhpeuh uh mite siatna ding leh midangte nopmawh sak ding namte na omlo hi. A neizo, a hauzo, a go a lupzo ding na kidem uh a, ahi zongin a hihzolote kisimmawh, kineumuh cih bang na omlo hi. Minam pawlkhat ah a zawng a genthei, a citheilo te kinengniam, kineumuh, kisimmawh cih bang om hi. Zomi sungah tua bang na om ngeilo hi. Tua pen Zomi te in mikim liangko kikim bangin  a et theihtna hi. Kikim bangin en cih hangin leitungah mihing pen a kikim in om thei taktaklo hi. A pilzaw, a hauzaw, a siamzaw cih bang na om hamtang veve hi. Ton Lam pen Zomi sungah a ci theite pahtawina leh a thupina uh a lahna uh lam ahi hi. Thupi in minthang hi. Zahtak huai a, pahtawi huai in it huai hi. A hoihna pen a Tong zo te in a tong zolo te simmawh in neu et cih omlo in, a Tong zo teng bek sam, lawm bawl, it bawl cih bang hilo in khuasung mi khempeuh, lawm leh gual khempeuh tawh a cihtheihna uh lungdam khawm, gualnuam khawm uh hi.

Tuhun ciang Zomi sungah zong a hau teng bek kikhawl nuam, a pil teng bek kikhawl nuam, a khuapi om teng bek kiho in khuata ah omte thudonlo, kinlo cih bangin i om khak leh tua pen Zomi Ngeina hilo a, kim leh pam pan hong kilawh hingelngel ding hi. Zomi te pen a Tong khawm diamdiam, a kiuap, a kipahtawi, a kihuaite ihi hi.

Lamvui: Gualnop ciang Zomi te in mi khempeuh kikawi in na lam ziahziah uh a, lamvui na kai uh hi. Rawang a om Zomi te in hih lamvui hong lak uh a, mipi in kilampih nuam mahmah himah leh hun tomno sung bek kingah ahih manin kilam manlo hi. I lungdam ni i gualnop ni in i lam khawm liailiai pen minam hampha ihihna hi. A lamkhawm theite a ki it hi a, a kingaite hi. Zomi te a ki it, a kingai, Vaphual nupa bangin a kisihsih te ihi hi. A ki nusia lo, a khawlkhawmte ihi hi.

Thugenna hun thumvei om a, Pu Chin Sian Thang leh Miss Joanne, UNHCR-CDU ban ah kei zong hun tomno cik genna hong pia uh a, hampha ka kisa a, ka angtang mahmah hi. Ka sisan kizoppih ka minam Zomi mipi hizah mai ah ka khatvei thugenna hi a, ka lungdam mahmah hi. Zong ka lawp  mahmah a, ahi zongin a lamet bang un ka gensiamloh ding lah ka lau simsim hi. Thugen ding mi thum lak pan a gen masa pen dingin hong seh ta lailai uh ahih manin ka ciling phial hi. Ahi zongin i lungdam in i lungdamni ahih manin hih bang hamphatna ka tan lah zatloh dingin pammaih kasa lua hi. Thugen dingin hong pai in ciin hong kisam zong hilo, Zomi Nam Ni na zat uh leh hong kihel nuam sing e, ka cih hibek a, makai vaisaite thusiamna leh deihsakna ka tan manin hampha ka kisa hi. Thugenna tomcik nei ding cih ahih mah bangin saupi ka genkhak ding zong ka lau hi. Ka thugen a tomlak in a nuai-a bang hi: 

...

Malaysia ah Zomi Nam Ni nuam mahmah - 3

Tuni in Zomi Nam Ni zang dinga hong pai khempeuh lungdamna khut kong len hi.

Minam a hong bawlpa in Zomi ah hong piangsak hi. Ka minam hihna pen ka teel hilo a, ka nu leh pa teel zong hilo a, ka beh ka phung teel zong hilo hi. Piangsakpa in a piansakna bangin a piang ka hizaw hi. Tua manin ka pianna minam pen kei adingin a hoihpen leh ka hihna hipah hi. Zomi pen Pasian in a niam hetlo dingin hong bawl a, huihkhi siang lenna, siktui siang a luanna, Phualva te tuallenna mualsang dawnah hong teengsak hi. Leitung khempeuh a suk et dingin mualdawn ah hong teengsak a, mite in Zomi te hong to et uh hi! Zomi te in midangte a suk et dinga hong koih hangin midangte a neu et ding, a simmawh ding, a niam et dingin cihna hilo a, a to etlo ding, a suk et ding cihna hizaw hi.

Midang simmawh ding ihi kei a, midang a it dingte i hi hi. Vaphual tawh tengkhawm ihih manin midang i it hi. Nopna dahna ah i kiveh a, kihawh in i kigal, i kilungdampih hi. Tua pen Vaphual itna tawh a nungta Zomi te zia ahi hi. Topa in leitung mite sanga lianzaw hamphat hong piak tampi om lak pan a manpha i neihte hi. Minam citak ihi a, zuau genlo, thudik, thumaan a gen minam ihi hi. Cikmah hun in mite ukna nuai ah i om ngei kei a, tomvei sung zawhthawh thu tawh Zomi te hong kikoih hi. Ahi zongin tua banga ukcipna panin i suahtakna dingin piangsakpa in gelna nei hidinga, tuni in tua suahtak kikna hanga lungdamna leh minam a hong piangsakpa phawkna in Ni khat ciamteh in Zomi Nam Ni i ci hi. A taktak in a suakta kik hilo in, suahtakna i neihsa a ngahkik ihi hi. Hong kilaksak hong kipiakik hi a, ei neihsa ahi hi. Cikmah hunin suahtakna neilo in Zomi te a om ngeikei hi. Khuasung hausa leh makai vaihawmte pen mipi adingin a semte hiden a, mipi a ukcipte hingeilo hi. A suakta minam Zomi ihi hi....

Gambel lam vaisai zum UNHCR pan Community Development Unit ah officer Miss Joanna in zong hong uap thei ahih manin aman zong thugenna hun hoih hong nei thei a, Zomi khempeuh in lungdam in khutbeng ziahziah uh hi. Aman a genna ah ahi thei bangin Zomi te maban hong kivanpih ding hi ci hi. Tuni a Zomi Nam Ni hong pai teng na khut taklam uh kong len a, Zomi Nam Ni nuamtak na zat ding uh zong deihsakna kong pulak hi. A kisam bangin zum lam ah maban zom zel ding hi hang, ci hi.

Pasal Hangsan puan kisilhsak: Pu Chin Sian Thang pahtawina leh Pasal Hangsan puan ZAM in silhsak in, lukhu khusak uh a, etlawm in thupi mahmah hi. Mipi khempeuh in thupi kisa, muhnop kisa in, hampha kisa a, a ngahtak mah hi ciin kiciamteh hi. Hong cidam a, a khansau a, a gam leh a mite hong huai den ding leh a beisa hun mah banga Zomi leh Zogam adinga ding den dingin deihsakna leh itna kilak ziahziah hi. Aman, "Na vekpi un na khut taklam uh lenin kong muak hi," ci hi. Zomi hong pianna ding thukhupna a omlaiin Pu Thang Za Kai in thu sunga, mihing 5217 lak pan mi 17 bek in khutlamlo in, adang 5200 in khutlam a - Zomi Nam Ni hong piang hi ci hi.  (A kicingzaw in a DVD ah na en un). Koi mun peuh ah om leng i minam Zomi mangngilhlo ding, i hihna Zomi i tunna gam tek ah pulak a tua min mah tawh kiciamteh dingin mipite hanthawn hi. A thugen khit ciang a tutkik ma in stage tungah la khat sa dingin a ut peuh sam a, hih la hong sakpih hi:

(a). Lia leh taang tem bang kitawi un,

Zomi Nam Ni lambang pak leng e.

(b). Zomi Nam Ni lambang pak leng,

Zomi buppi angtanna hi a,

Bang i thasial (thangsiat) na diai lawm aw e.

Zogam Cowboy lukhu khu: Lungdam kohna Sia Kap Lian Thang a neihma in Lengtong Kam Khen "Zogam Cowboy" cih minpha piakna lukhu khuksakna hong nei hi. Pu Kam Khen pen tuni panin Zogam Cowboy hi ciin kiciamteh hi. Zomi cowboy puan kisilhsak a, lukhu kikhusak hi. Aman, "Kei hong pahtawi na hi kei uh a, na pianpih na sisan mah a pahtawi hi uhteh," ci hi. "Ka innkuanpihte in zong Malaysia ah om i Zomi pihte na hopihsak in, ciin hong vaikhak uh hi,"ciin pulak hi.

Tuate khit ciangin Sia Kap Lian Thang in lungdamna thu siamtak in hong gen a, tuni a hong pai mi khempeuh tungah lungdam thu a gen ban ah - Zinmang Pu Chin Sian Thang leh amah hong uap khempeuh tungah lungdam ko hi. Zomi Nam Ni celebration committee te kipiakna leh hanciamna leh sepgimna hangin hih ciang a kitung hi ci hi. Vai thupi hih bang nopci taka hong zawhpih makaite leh mipi tungah lungdam kohna a neih khit ciangin a ban ah kizom suak lai hi.

Zomi Cup 2013 Champion's Trophy Piakna: Malaysia gamsung bek hilo leitungbup Zomi khempeuh hong lawpsak leh hong engsak mahmah Zomi Cup 2013 ahi hi. Hih sungah football team 41 kihel a, team khat ah mi 20 min khum thei in a sui bekbek zong mihing 820 pha a, a en mite kihel nailo lai hi (Team 41 x 20 = 820). Pasal in football sui in numeite taikidemna nei uh hi. Football ah Champion team Nguasing Khua trophy golpi khat kipia hi. Numei taihat penpen zong trophy kipia hi. Gualzawhna a ngahte i lungdampih a, a tha uh zong kihual mahmah in a mel uh en leng zong Argentina pan hong pai hi ung, Maradonna lawmte vive hi ung a ci ding tawh kibang hi. Singapore Zomi te tawh kikholhna in khatvei kisuih ding bang ut huai phial hi..!

Hih medal leh trophy piakna hun ma in Zomi Cup hong patpih makaite pahtawina pia masa uh hi. Tulsa, USA hong lensan khin Tg. Khampi leh Pa Lang Kap ahi uh hi. Amau makaihna tawh Zomi Cup pen kum 2010 in a khatveina na nei uh hi. Tua pan kizomto zel in tukum a kum 4na ah khua 40 pan team 41 a kihel thei ahi hi. Hih banga makaite a pahtawi uh etlawm in ngaihsun siam kasa hi.

Kimawlna makaite genna ah Zomi Cup pen gualzawh kidemna hilo in kilawmtatna leh kikholhkhawmna hi ci uh hi. Tua pen Olympic deihna (Olympic Spirit), "Not to win but to take part" (Gualzawh ding thupi masa kei kihel ding thupi masazaw) tawh kituak mahmah hi. Team 41 in ni 7 sung 96 vei sui uh a, khatvei zong kuamah a ziakai omlo in, a hun ciangtansa lianlian in kipan in zo den uh a, tua banga hun zat a khatveina hi ciin ciamteh uh hi. Zomi ten i sawm taktak leh leitung pen a uk zolua hilel hang. Hunlap cihte a hih theilua hihang, mikangte leh mikhangto masate bek in a zat theih uh na hikei.

Tutung Zomi Cup pen Chinese New Year tawh kituak a inn ah ka omcip sang va zin phei kha mai leng ka mittai in ka mangngilh loh ding thu tampi va mu mah ding hiveng maw ciin ka kisikkik phial hi. Ahi zongin a nuamzaw hunte i masuan hi cih bangin a kumsim in nuamto semsem ding hi cih ka lamen hi. Mai kum ciang bel aw... 

---

Malaysia ah Zomi Nam Ni nuam mahmah - 4

Numei tai hatte a tha uh hoih in model figure vive hi uh a, medal leh thaman a lak ding uh ciang tangvalte mit tai duamduam hi. Phamawh kei, papi te zong na kidekzo tuanlopi! Numei thacing, duang hoih, khut leh khe leh pumpi kitawi litlet pen Kumpi Solomon nangawn in etlawm sa in la dawng tampi na phuak lawh hiven maw... Zomi te zong i peng tuan sam diai...

Thaman tuamtuam a kihawm khit ciangin Lucky Draw a ngahte min hong sim uh a, a khatna in Laptop Computer a ngah hi. Zomi Nam Ni in Zomi numei khat in a khut sungah leitung khempeuh tawh a kizopna ding laptop khat a tawi liatliat hilel hi. Leitung khempeuh thucin thutaang, thumanpha leh pilna theihna a khangsak ding tampi a luakna ding machine, it leh ngaih leh u leh nau a kuamah peuh tawh internet tungtawn in a kizop theih nading ahi hi. Hampha a, lungdampih hang.

Tuni, Zomi Nam Ni in Zomi tampi nuntakna ah a khantawn a mangngilh ngei nawnloh ding thupiang a om hi. A khantawn in Zomi Cup 2013 Champion ahihna kuamah in laksak thei nawnlo ding, a tu a tate dongin gen, hilh thei dinga, a tu atate in zong ka pa, ka pu pen football champion ngei hi ciin na kisakpih thei ding uh hi. Ka nu ka pi pen Zomi sungah kum 2013 kumin a taihat pen hi. Ka nu ka pa pen Zomi Nam Ni hamphat kidemna ah a hampha pen nu hi, pa hi na ci ding uh hi. Zomi Nam Ni leh Zomi te hun thupi mangngilh ngeilo ding uh a, a ngaihsut khak sim un lungdam in maitai ding uh a, Sia Job Thawngno kammal kawm hilehang, "A langlam uh hek in nui viuveu ding uh hi."

Hun Nihna kipan taktak ta ding: Zomi Nam Ni hun nihna pen a makaih ding Lengtong Kam Khen hi a, hun masa ah zong pahtawina a kipiak sung bekbek in zong a utteng salkhia man ahih ciangin hun nihna sungah aman makaih leh bangzahta in mipi te hong lawpsak in hong nuisak in hong gualnuamsak ding hiam ciin mipi in ciltui kai liangin a kigal-et ahi hi.

Ama hun kipan taktak tading hi cih a theih ciang a tutna pan dingkhia in a khut veilam tawh dena a dawn Red Bull bunghawm tawi kawm in thakhat thu in a lukhu vom a lutung ah suangto a, stage nunglam manawh dingin steps tungah a tuanto leuhleuh hi. Mipi in a sam sakol mei banga a gak, a sansak hiuhiau leh a lukhu vom a nunglam mu uh ahih manin khutbeng ziahziah in lawp mahmah uh a, amah bel a theilo, a zalo bangin stage dalna puantualpi (curtain) liah lam ah a lutsuak hi.

A ut hunhun a a sap dingin Zomi lasiamte min (Zomi Singers or vocalist) kigual diudeu a khutsungah tawi kawm sa in hong pusuak leuleu a, mikang pau tawh mipi te in bil a dawh takpi uh hiam cih hong sin hi. Ciamnuih mah tawh hong pan phot zawzen a, mipi in khutbeng ziahziah hi. Zomi Nam Ni ka kihel lak pan nopci belbel lai.

Dotna leh Dawnna laidal zong pia uh a, Lengtong Kam Khen in hunzeek a sep kawm in a ma hoih sak bangbangin hong dawng ding hi ci uh hi. A dotna te mipi in kithei nailo a, kithei nuam in a dawnna kitheinuam zaw diak hi. Lasa dingte a banban in sam a, Nuamboih, Muan Cing, Man Huam, JK Zom, Sian Cin, Khaipi, leh a tul theilo Zogam Lapu TS Khai, Lengtong Pauno, Lengtong Kam Khen te zong a vekpi in sam hi.

Malaysia ah Zomi Nam Ni nuam mahmah - 5

Lengtong Kam Khen in dawn dingin dotna omsa pawlkhat sung pan --- "Mi namdang tawh kiten bangci nasa hiam?" cih dawnna nei a, mipi nui ziahziah hi (http://www.youtube.com/watch?v=WmrHVJQ3E5g). Lai Siangtho in zong a genna bangin i theihsa hi - i telsa mi mah la lehang hoih pen hi ci a, hi zong ka sa bilbel hi. Adangte ei mahmah in a video pan en leng muhnopzaw! Pu Kam Khen pen 'sikhang' leh 'sakhang' bekbek a gen isak leh thu tuamtuam khat peuhpeuh gen leh a zaknop hikhin mai ei. Ahi zongin Zomi Nam Ni in deihzah in ki 'show' lo ahih manin nupi pawlkhat bang hehsuak phial, tangval lai hileh a tanu te uh heelsak phallo phial ding bang hi... he he. Mipi in kilawppih in, ama ciamnuih in i leitung nuntak gimna tampi hong mangngilhsak tuam hiding hi. 

Zomi Education Centre pan Zomi lam tuamtuam lahna leh Aksi Lam a cih uh zong lahna nei in Zogam it ding, Zomi zuun ding cihte hong phawksak kikkik uh hi. Lungdam a, nakpi takin i neutung mah pan Gam leh Minam itna i kineihsak ding himah hi cih hong phawksak hi. 

Zomi sungah kipattahna, mikangpau in parenting a cih pen kisam mahmah hi. Minam it ding kisinsakna, innkuan it ding kisinsakna, cihte kisam mahmah hi. Pau leh ham a siam kei uh leh a it dinguh baihlo hi. Amau kua hiam cih a kitheih kei uh leh a it ding uh thei mello in khangto ding uh hi. Zomi ahihna uh a tel mahmah kei uh leh Zomi it ding theilo ding uh hi. Zokam na pau zongin Zomi na hihna bangteng hiam cih na tel kei leh Zomi na it thei kei ding hi. 

Hih Zomi Education Centre (ZEC) pan sangnaupangte in Zomi ahihna uh lak in hong lam ziahziah uh, Zola hong sak ziahziah uh ciangin Zomi itna hong lian mahmah hi. Mi khempeuh muhna ah Zomi i hihna a lak uh hi a, Zomi a itna uh a lak ahi hi. Hih bangin naupangte minam i hihna, bangin Zomi ihihna lak hiam - i Zolam, Zongeina, Zola, Zokam, Zopuan, etc cihte a tel mahmah uh kisam hi. 

ZEC sangnaupangte in la sak uh ciang ka lungsim hong dong mahmah khat om. Naupangte maitai mahmah khinlo mawk uh hi. Banghang hi ding hiam ciin ka ngaihsut ciang - a sangkahna uh pen 'lamlak' pian hi cih tel uh ahi tam ka ci hi. A diak in a upa lam deuhte in lamkal ah vaitham lai uh ahih uh kithei ahitam ka ci hi. Nunglam lah hei theilo, mailam lah nawt thei pak nai, lamkal ah vaitham lai ahih manun a sangkahna uh pen 'kiallap' hi cih tel uh ahi tam ka ci hi. Hih pen i Zomi pih tampite dinmun, a tuak laitak thu uh himawk hi. Tate sanghoih ah kahsak nuam mah taleh hithei nailo. Sangkahlo in omleh lah mailam ding sauzaw lai. 

Tua manin Zomi naupangte adingin thungetna zong nakpi in i neihsak ding kisam sa ing. 

Lengtong Hoih lasiamte'n awi ziahziah: Ka neutung pan ka zaknop, ka ngaihnop leh ka thupi ngaihsut mahmah Zomi lasiam lak ah Lengtong Hoih Lasapawlte ahi hi. Lengtong Pauno in, "Zogam Hong Paal Ding Hi," cih bang a kipum bye heart (lot ngah) giap hilel in maw. A limlim in Lengtong Hoih lakhui sunga late khempeuh a ki ciamteh mang khin. Tonsim (Champhai) pai a lai atloh bu lei a Labu dinga kizang ngei himawk hi. Tangval toh ciil lam in nungak hoih khawng a kitheih pianpian, mukmul vasa mei banga hong po kipat ciil lai khawngin Lia leh Taang kingaihna late kideih in i kam tawh a kigen ngamlo te Lengtong Hoih late sung pan kisa hiauhiau hise hi. Tua manin:

'Ni khat kong muh loh kum kivei bang, 

Taang kei zuan bang Lia nang na zuanglo maw?' 

cih lamalte khawng ki repeat mun lua himai hi. Zolia te in zong na theisiam in:

'Cik ciang ka siangah hong leng in vangngaih sinthu nong lel tam,

Nang ngai lungzuang huiva bang na maumau ing'

khawng mah tawh hong dawng ziahziah lel uh hi. Lungzuang sak teei ei, i ngaihsut kik leh... sen leh kik thei leng maw...

Lengtong Pauno in solo a sak ciangin mipi in khutbeng ziahziah in nop kisa mahmah hi. A lawm Lengtong Kam Khen mah in no masa zel ven cin, amau kihona bekbek zong a zak nuam a, amau kimaingap bangin amau zong kimaingap pah himai hi. Zomi lasiam sungah a masa, a madawkte hi uh a, Zomi leh Zogam hoihna awi cim theilo in Zolengthe te tawh awiawi lai ding uh hi. 

Zogam Lapu cih min a piak uh Sia TS Khai in zong "Zogam Vontawi Taangpaal ka hi," cih hong sa zeza a, ama kam pan kisa ka khatvei zakna ahih manin ka lungtang hong dawt kha peuhmah hi. Ka u Thang (Sia Suan Lian Thang) in a tangval ciil in Zomi tangvalte in Champhai pan Aizawl Long March a neih kim un Lamka a va zinna pan ZOHEISA Khui hong lei a, hih Sia TS Khai la pen na om hi. Tua zawh a sawtlo in Shillong ah College kah dingin ka pai ciang Union Christian College ah BA simlai Zomi Lasiam Tg. Go Lam Thang Hatzaw in zong 1991 kum Zomi Students' Association Maithak Muakna (Freshers Welcome), Nongrim Hills School ah a neih laiin hong sa a, 

"Vana leng vasa in zong bu nei, 

Ken bu nei nailo.

Lei a taai zusa in zong kua nei, 

Ken kua nei nailo..."

cihte bang a sak ciah i cimul tho in i hehtha lah suak, i septha lah suak, tha hong pia in lungsim hong lawng a, Zomi leh Zogam adingin sep utna lungsim hong guan hi. Sia TS Khai tawh kimu thei, anne khawm, lasa khawm, tukhawm kha thei ka hih manin hampha kisa ing. A aw zong a hoih ngeiin hoih a, a la zong a ngaih ngei in ngaihin, a siamna zong khang semsem hi. 

Kumsawt tangbang damin Zogam Zolei hong awi cim kei henla, la thak thu thak tampi hong phuaksak laita hen. 

Lengtong Kam Khen in zong a ut teng a ciakciak khit ciang mipi in Hunta cih mahmah om theilo in kicimtaklo, ki am mahmah hilel hi. Ahi zongin nopsa in am in khialah taleng hun leh ni in hong ngaklo in na paipai a, nitak nai 5 hong satta a, Pu Kam Khen mah in, Zogam Cowboy, etc te a sak khit ciang: 

"Zalmangpha hong khak ing, Ciin leh tuai aw,

Zalmangpha maw, Kei va ciah ning... 

Heina peuh ah, Sian in siam hen....

La la la la la......"

cih tawh Zomi Nam Ni zang khempeuh mangpha hong khak a, lungleng tak, thawmhau tak, lungsim khitui luang in hong omsak a, Zomi Nam Ni a bei mai ding it in lungsim kap ngeungeu hi. Ahi zongin hun nuam khempeuh khoh nuam in it in lencip nuam taleng, kikhoh theilo, kilencip theilo a, a nopna khempeuh tawh a bei kul hi. 

A nuamzaw kum in hong ngak a, a thupizaw hun i masuan hi. Tukum sang maikum nuamzaw dinga, a kum a kum in nuam semsem ding hi. 

Rev. Cin Sian Pau in "Lungdam Kohna" hun khempeuh hong zosak vantung leitung a bawlpa leh Zomi te minam a hong bawlpa tungah a koh khit ciangin Zomi Nam Ni hun nuam hong beita hi. Lungdam maitai khut kilen in MAIKUM CIANG KIMU KIK NI MAW ciin mipi MANGPHA kikhah diamdiam hi. 

Topa in Zomi leh Zogam hong kem henla Zomi Nam Ni pak bang vul semsem hen. 

Tukum, 2013 Zomi Nam Ni Malaysia ah ka zat nuam kasa mahmah a, ka zi bangin "Mai kum ciang zong paikik ni maw," hong ci lianga, "Aive maw ngaihno," ka ci khin kha liang hi. 

A nuamzaw kum i masuan hi...

Heina peuh ah Zomi!

 ZOMI NAMPI NI FEB.20,2013

Zogam Cowboy Phuitong Liim ah Hong Khawl

 

Zomi lasiam Lengtong Kam Khen Phuitong Liim ah tawmvei hong khawl! 

Pu Kam Khen pen tukum Zomi Nam Ni in 'Zogam Cowboy' title a kipia ahi hi. Vai hau mahmah in manlah mahmah hi. Hawhna ciahna ding hau mahmah in, a mu nuam, a hopih nuam tam in a hun kicinglah mahmah a, tawlngakna ding hun zong a ngahlo phialphial hi. Singapore nungakte (a diakin mikang leh sente, malayte, etc) in a sam san hiuhiau a muh uh ciangin "Hihpa pen mi mawkmawklo hiding hi" cih tel pahpah uh hi. Tua manin a vakna peuh ah 'maan kilakpih ding' tam mahmah in tourist spot te diakdiak ah maanlakpih ding tam uh hi. Lamet hetloh pi in hun hong ngah thei bilbel in, Phuitong Liim ah hong tawlngak theih ciangin nakpi lungdamna khang hi. 

A tuanna dinga Korea te in lusu manlo lianga a bawl uh engine ging hialhial tung pak a khe veilam hong suankhia masa in a khe taklam tawh leilak a sik khit ciangin a tuanna zawl hiuhiau tung pan Singapore leitang a sikkha leuleu ahi hi. A sam, a nungzang ciang a pha zilzial pen a langkhat a nunglam ah gakcip in a dangte khah ningniang a, a kilawm khop dinga mel tuamtuam a neihsak tawh a nunglam pan mu leng zong 'celebrity' (mi minthang) hi cih kitelpah hi. A liangko tungah a Cowboy Bag kuah in, a khut taklam ah a pistol bawm khai in a tuanna car pan hong tuakkhiat ciangin kilawm in a sun glass vom hiuhiau bulh in hong khuadak a, Lengtong Pu Kam Khen hi cih kitel pah hi. Cowboy te a vante uh tawh kikhen mengmenglo hi mah leh en zong kuah nuam, pua nuam teei ihih manin 'kong dawn diam' ciin ka nget ciangin hong lawngsak ahih manin angtang takin ama liangko tung pan ka lakhia a kei liangko tungah ka suanto hi. Tua laitaka ka angtanna (joy, happiness, etc) kama gen ding hileng ka gensiam kei ding hi. 

A tuanna Zogam Bawngtal hong tonpih theilo, kumpi in phallo ahih manin a cowboy khedap a muk zum zilzel tawh kalsuan ziahziah in a paina ding lampi maban omte kawkphei ziahziah hi. A cowboy pheituam, patpuan a kibawl nitumna lam gamte in Jeans a cihte uh zong a pheipi tuam phitphet, a tangai zum zihzeh zong kilawm mahmah hi. A gei ah pai leng kimuang giap hang. Zogam Cowboy tawh lam pai khawm cih pen a angtanhuai lua ahih lam ka mangngilh thei kei ding hi. 

Cowboy te zong na kamsiam mawk ei - na inn uh siang si e, na inn uh nuam si e cih bang hong gen hi. Mithupi leh  mi minthangte in mite lungdamna ding zong a kilawm ciang gen phamawhsa lo uh hi cih hong telsak hi. 

Zuau gen ngeilo, hem genlo, thutak, thudik, a hi bangbangin na khat peuh a gen Zogam Cowboy ahi hi. Thudik lah imlo, zuau lah phuaktawmlo, ahilopi lah ahi bangin genlo, a hi takpi lah ahilo banga gen selo Zogam Cowboy ahi hi. Hih bang mi tampi i kisam a, zong i nei a, amah khat ahih manin i lungdam, angtang hi. Zogam Cowboy in Zogam hih bangin thudik, thumaan in hong gum leh i khamuang hi. Mikangte in Prince of Thieves (Gutate Kumpipa) Robinhood na nei uh a, mizawng, midaipamte na huh in na panpih hi. Mite simmawh, mite sikcip leh mite neubawlte na huh in thudik, thumaan a omna dingin na hanciam hi. Guktak pen ahoihlo ahih hangin mizawng daipamte noptuamna ding ahih nak leh Robinhood in na gu ngam mawk hi. Siatna khempeuh zong a sia na hikhinlo a, a deihna a tangtunna dinga lampi khat, vanzat khat hilel hi. Moses in a mithah pen a mipihte a gupna hi a, mithahna a sia ahih hangin Moses dinmun ah a mite a gupna ahi hi. Robinhood in a mite a gupna in a nek ding uh a van ding uh gu ngam hi. Pu Kam Khen in Zomite hong it manin thudik, thuman imciplo in genkhia ngam hi. Mite gen ngam mengmenglohte aman ciamnuih tawh thuah in kilawmtak in hong genkhia a, kuamah heh theilo, kuamah lah ci kha selo, mi khempeuh lah sukha cip in dik mahmah hi. Tua bang pilna leh siamna a nei Zomi sungah Pu Kam Khen i neih hampha hang. 

Ka tan 4 sinlai a sangkah tawp ciang khuamual ah Bawng hawl a ka pai na lampi ah ka saksak uh "Ama min in Lengtonghoih" cih la ama kam ngiat tawh a sapa Pu Lengtong Kam Khen tawh 2008 kumin kimu thei ka hih manin ka angtang a, hampha ka kisa hi. Tuni, March 6, 2013 nilaini nitak in ka omna Phuitong Liim ngiat ah hong khawl thei kik ahih manin ka angtang sem hi. Zomi Nam Ni zatna Malaysia ah zong tomvei sung kimu kha ka hih manun leh holimna hun nuam nei kha ka hih manin hampha kisa saan ing. Hih bang hunpha leh hun nuamte cikciang kimu kik ding hiam. 

Zomi lasiam lak ah lasak bek hilo in mipi lawpsak (entertainment) zong siam thuah lai ahih manin amah pen a tuam vilvel hi. Football Manager lak ah Jose Mourinho in, "Kei pen mi tawh a kibanglo, a tuam vilvel, "The Special One" hi ing, acih bangin Zomi sungah Pu Lengtong Kam Khen pen The Special One hi. Mi tawh kibanglo cih ciang mite sangin talent a neithuahzaw, a siamna a thuahtam diak cihna hi. Mite tawh kidemna ah siamzaw cihna hilo in a pianpih ah hih theihna, nasep siamna tuamtuam hau diak cihna hi. Thuthuk gente kammal zang leng "Talented" khat himawk hi. Tua hi kei leh Zolai Tan 4 ciang zo in Zomi khempeuh lungsim hong lawng, hong phawng, hong phong den hi. Kam khat a pau ding kingak a, kam khat a gen kik ding kingaklah hi. Ciltui kai liang in kingak a, cilphul liangin a ciamnuih kik ding kingak hi. Tua zaha Zomi sungah i lungnopna ding hong genkhia ziauziau thei kiomlo hi. Kisin khol, kigingkhol hi vetlo in ama khuak pan hong lengkhia ziauziau hi. 

Phuitong Liim ah hong tawlngak sungin Zomi sungah lungngaihhuai a sak tampi gen a, i nuntakna i mawk zat loh ding, i nuntakna a manpha in i zat ding leh a hoih a kilawm in i gamtat ding mah thupi in nei hi. Farisaite banga puatham leh kampau bek ah hoih a, a sungtawngah a hoihlo mite hilo dingin Zomi khempeuh hong deih, hong lamen hi. Tua banga kilimneihte mipi in thei veve ahihna te ciamnuih kawmkawm in hong gengen ciangin i nuihza lua in i gilvun bang na liang hi. 

Ann bel tam nek hetlo ahih manin a figure a hoih den ding mah hi. Kum 35 zawh ciang ann tampipi ne luate a gil uh kidawk pha deuh ahih mah bangin amah annek kidawm siam in a hoihbek ciang bek ne thei ahih manin a pumpi zong a kilawm khop in Cowboy Figure den hi. Hun nuam, honuam hunte cim manlo in ama thuhoih nono ka ngaih hithiat laitak un zankim hong peel duaiduai ahih manin cimlo pipi in ka am nop uh hangin hunpha hong tung kik ding cih lamen in "Mangpha" ka kikhak phot uh hi. A nuamzaw hunte i ngaklai hi cih bangin a hun nuamzaw tampi masuan lai ihih manin ihmut nang liang, gim leh tawllua ding ka kidekzaw uh hi. 

Zomi lasiam, Zogam Cowboy, neutung "Hero" in ka omna mun uh hong muhpih, ka tenna uh hong siksak, amah tawh ankuang um khawm, honuam khawlkhawm thei cih ka ngaihsut ciang hampha kisa in, angtang ka kisa semsem hi. Topa in Pu Lengtong Kam Khen khansauna leh thupha tampi tawh hong phungvuhsak laita hen. Gennop tampi omlai, zong gen toto lai ding...