1:33 AM (19 hours ago)
 | | |||
| ||||
Muh ciil Melbourne - 18
Pu Zokhai tawh: November
21 ni zing nisuak silsial ah ka thawh toh leh Phone hong ging a, ka lak
leh Pa Zomi Zokhai in "Zingsang niangtui i hawp khawm man diam?" ciin
hong zawn na hi hi. "Man tham e. Nang tawh kimu ding ihih leh i nuam
ngel kei ding maw, kong tuna nong welcome na laikhak zong na ngah khin
hiveng," ka ci hi. A sawtlo in a car kang kiukeu tawh hong tunga, Japan
te in lusu manlo lianga a tuanna dinga a bawl sungah nuamtak tu hilhial
in amau inn lam ka manawh uh hi. Lampi ah nek ding, dawn ding hong lei
zangzanga, "Hong mipi bawl si cia maw," ka cih leh, "Koh zong ka nek
ngeiloh vive uh a lei himah ing. Noh tawh ne khawm ding ihih cianga a
vaihawm hi ing," ciin mikang ann lim nono hong lei zihziah hi. A inn
vuah Sawltak Paul na zintung ngei ahi tam ka ci phial hi!
A inn uh ka tun ciang un ama bawl Garrage (mawtaw buk) na kilam lianluan
a, inn lam khutsiamte khutma hong musak hi. Inn sungah lut phei in
innteknu Singpi nu zong nui siuseu, maitai takin hong dawn in hong
khutlet pah ziahziah in, ka nek ding uh inntekpa puak teng hong lui pah
in holim kawmkawm in ka ne ziahziah uh hi. A tapa uh Mang Lian Zokhai
suahzawh sawt nailo ahih manin innsungah nauluai leh a ute
kimawlna tuamtuam na om zihziah in khanglui ten 'nau nen laitak' acih
te hi in nopci mahmah uh hi.
Naunen mahmah e cilo in Pa Zokhai in a khutsiam tawh a bawl Zomi Vaphual
lim leh Australia Koala limte inn sungah na suang bimbiam a, Art Show
om ding ah a lah ding ci hi. A lah khitsa pawlkhat zong sum tawh
kileisak napi a khatna la zolo ci hi. Zomi sungah hih bang khutsiam om
cih pen ka mittang tawh ka khatvei muhna hi. Ama khutsiam dan pen a
nekzonna hilo zaw in a cimphawng nasep (hobby) hizaw hi. Hobby nasep
tawh sum muhna nei thei cih pen hun awng zatna hoihtak himawk hi. Tun
mai ah Christmas ma in Show om kik dingah a kihel sawm hi a, Prize a lak
ding ka lamen hi. Mi tawh kitheihna leh lawm bawlna hun hi a, kumpi
lamte in mihing mawk om cip lo in cimphawng in khutsiam, nasep nei leng
cih a deihna ahi hi. Zomi khat Australia kumpi vaihawmna ah a kihel thei
den khat nei hang ciin ka lungdampih hi.
Zomi bek a it hilo, Zolai zong a it ahi cih ka va mu hi. A laibu bawl
khat hong pia in, a bawl khit nailoh khat zong hong velsak hi. A thu te
hoih mahmah in, thu tuamtuam kaikhawm zo kasa hi. "Bangci na sa a," ciin
a bawlkhit nailoh pen hong dong a, "Hoih mahmah ei. Ahi zongin 'double
vowel' pen a sim dingte in bangci'n a ngaihsun uh tam maw," bek ka
ci hi. A laipai hoih mahmah in, a thu zong kicing mahmah a, Zolai Zokam
ah a om ngeilo kammal thak tampi kihel in, behlap ahih manin Zolai
khanna dingin a hoih mahmah khat hi. Hih bangin Zolai leh Zokam a
bucingsak, a behlap zo, a picingsak semsem i om zihziah ding a kisam hi
a, tua tawh kiton in a thak peuhmah mipi a zangte kiangah a zatdan, a
kisapna, a hoihna leh a thupina, amanphatna cihte a gengen ding, a
pulaklak ding, a hilhhilh zo ding zong kisam hi. Tua ahih kei leh Zolai
nasemte leh mipi kikal kigamla lua leh mipi in delh phalo thei hi. Tua
manin Zomi khempeuh in i sep ding tavuan tam mahmah lai hi cih phawk ni.
A huan sungah ka lut uh leh mi thanuam hiding cih kilang a, anteh lohing
na ciing in, huan neu khat na bawl a meh ding kila thei dekdekta hi.
Naupangte kimawlna ding football leh basket ball cih khawng na bawlsak
a, music kisinna ding uh piano khawng zong na nei in mihing a pattah, a
lamsang nuam khat hi cih a innsung, a innpua i vel ciang kimu thei hi.
Malaysia ah a omlai in Zomi Association of Malaysia (ZAM) zong ei a
mipih Zomi te puah a laptoh nadingin a phuan uh ahi hi. A kisam a muh
leh a thek nuam, a tholh nuam, a bucingsak nuam mi hi cih kimu hi. A
lasakna khui khat ama Car tawh ka tai kawm un hong hong (play) a, "Siam
si uh e, kuate ahia?" ka cih leh, "Keima om muanga ka khum hi," hong ci
ziau a; Zolai Sim Bu ah "a kihta sim pian pah hi" acih bangin Pa Khai
pen khutsiam bek hilo, minam vei bek hilo, lasak siam zong himawk hi cih
ka tel semsem hi. Talent tampi nei mi hi cih kimu hi.
Huan sungah ka vakvak kikal un innteknu Singpi nu in ann na huan
kheuhkheuh in a sawtlo in, "Hong paita vo leh, ann minta ei," ci hiau
mawk! Kalaisai!! Zingniang (English breakfast) ne dinga pai pen sun ann
nesuak ding cih mawk aw... hong kisuan huai phial a, ahi zongin Singpi
nu in lui khinta ahih manin ka ne uh hi. Ka nek vanglak uh ciang lah
nekloh khak ding ka lau kik hi. Australia bawngsa, voksa te mahmah
limmawk ei!! Anteh lohing khempeuh lah fresh lua mahmah lai... khanglui
upate in zong'nene puksi omlo' na ci uh hiven maw... tampi mah ne kik zel ung ei.
Ann kham ciang, "Pai vo, ding dih vo, Melbourne inn sang penpen ah va
kah dih ni ei," ciin a car hong hawlkhia in ka pai uh hi. ZOTAWI LIANU
video a kilakna munte uh hong hawlpih masa a, "Hih lei pen aive Zotawi
Lianu in a U Thang a kibuksanna. Hua lai ah hong pai phei in, hua ah
kibu in, a den ciang hua tui gei ah kimu kik hi ei..." "Aw, aw..." ciin
ka dawnga, ka mitkha ah Thangno in Cingno a zonna leite hong kidawk
daudau hi.... "Hilua zen veh" ciin ka 'confirm' hi. Zotawi Lianu movie a
shooting na munte uh va en kha kawmkawm himawk ung ei! Zomi historical
events mun pawlkhat... Melbourne na zin ciang 'must see' ahi aw!!
Pi Lun leh Zotawi Lianu in hong vakpih lai a ka annekna gei vuah taisuk
in Australian Open Tennis a kimawlna gei vua Olympic Village gei ah
paisuak in lawm Mungsen zi Nu Thangte in hong vakpih ni a ka paina gei
uh Botanical gei ah tai phei suak in Melbourne khuapi a inn sangpen
EUREKA building gei ah ka car uh ka koih uh hi. Sumnen khia in lamgei ah
car kikoih thei a kizen peuhmah hi. Car khawlna pan minit 5 khawng pai
leng EUREKA innsang kitunga, a gei ah Mualsuang khawng peuh kiphut in
tuate tawh maan kilak khit ciang innsang kahna ding Ticket ka lei uh hi.
Pu Zokhai in, "Kei kong vakpih ahih ciang ken kong kahpih kul hi,"
ciin a kahtoh man zong hongpiaksak lailai a, car tawh hong vakpih bek
hilo, The Highest Post Office in Australia omna inn level 88 tung dongah
hong kahtoh pih hi. Ka dakkhiat mah uh leh a gamla lo ah Rod Lever
Arena Tennis Court te na kidawk zihziah a, "Nuvaw, tuzawh a sawtlo, kha
nih cin January 2013 ciang AUSTRALIAN OPEN om ding hiven maw, hih tung
pan kien zen leh uthuai mah si e," ka ci kha liang hi. Durbin tawh et
kul inteh, a mi bel kimu cian sam kei. Olympic Village ah Stadium te bel
etlawm peuhmah hi. West Bridge leipi zong kimu a, leipi sangpi, golpi
kimu bembam hi. Tua lei pen nungkal in Ni Dim te kiang ah anne in ka pai
un ka Pu Sawm Thang tawh a car in ka tawn kha zo uh hi. Tua leipi nuai
ah, a gei ah, a pam ah gunkuang pak seisai vive kigual demdam a, mihau
mahmahte in a noptalna vua a zatte uh ahi hi. Tasmania Queen kici hiam
khat Tembawpi khat zong bel Tasmania paite tuanna dingin luipi gei ah
kidawh a, Tasmania zin ding peuhmah tua tawh zin thei hih tuak hi. Koh
bel tutung a zin man nailo hi ung. Tasmania pen Australia leitaw lam ah
state khat hi in tuikulh ahih manin tui tawh pai leng tuipi tungah
khualzin nuam mahmah in a kigen hi. Zinkik ciang hilo dia!!
Australia inn sangpen ah kah cih buang ciin lawmnu in, "Pu Zokhai nong
vakpih lungdam, ka lungdamna uh lahna in Coffee maw Niangtui," a cih leh
Pu Zokhai zong milian milal tawh kikhawl ngei cih mah, "Noh duh
bangbang kei phamawh sa keng e," hong ci phot a, "Taktak in bel kul kei e
Siamah Cingpi aw," ci sawnsawn hi. Gamtat luhek a theite tawh kikholh
pen kidawm taka gamtat mah a hoihzaw hi cih High School kah laia ka sin
uh ka phawk hi. A tawptawp ciang Coffee, English Breakfast Teas leh
Cappucinno cihte ka vaikhak tek uh a, gilkial man hilo in Pu Zokhai hong
vakpih lungdamkohna ci-a lawmnu Cingpi in hong vaihawm zong siam ka sa
veve mawk hi. Nu Thangte tawh ka vak un zong Flinders Street Train
Station sungah Coffee leh Cake ka ne uh a lawmnu mah in hong 'taih'
(treat) ahi hi. Pi Lun leh Princess Kimno, Zotawi Lianu tawh ka vak lai
un bel Pi Lun in, "Koh inntek hi ung," ciin ka treat sawm uh hang hong
phalvetlo, amau vive in hong 'nekpih' zen uh ahih manin Pite Pute hong
itna thupi kasa a, hampha ka kisa uh hi.
Coffee leh Cake nek kawm holimlim in Zogam leh Zomi thu mah in lungsim
hong luah pen hi inteh tuateng mah Pu Zokhai tawh ka gen pen uh hi. Zomi
a pai khempeuh in zong Zomi leh Zogam thu hih inn sang tung pan na
kikum tangtang uh hen! Coffee leh Niangtui te nek khit ciang a pam ah
munkhat sikkhau bek tawh ki um in a omna mun ah ka dakkhiat mah uh leh
maw.... huih hatlua, mit bang san zo, khitui bang luang ziahziah zo mawk
hi. Huih lah vot cihtak in vot lai! Innsang dawn tua bangah tua zah in
vot, huihhat hi cih a kitheihna dingin tua bang inndei khat a kibawl
himawk ding hi. Va muh, va theih khak zenzen zong kimangngilh ngei
nawnlo ding himawk hi.
Inn khum ah kahtoh cih pen hun tawh kiciangtan ahih manin ka hun uh hong
bei hiaihiai a, minit 30 sung cih pen a tomcik sung himawk hi cih ka
phawk hi. I nuntakna minit 30 sung a manphat dan, thu tam a kigen man
dan, vai tama kisep man dan, semlo in om mawkmawk hileng a pammaih ding
dan cihte hong phawksak hi. Banghang hiam cih leh minit 30 sungin
Melbourne inn sang penpen dawl 88 tungah kitungto man, khuapi sung
khempeuh a kimu thei ciangciang kien khin man, niangtui dawn kawm in
kiholim man, laikhak gelh in Post Office sangpen ah khia ding hileng
zong kigelh man ding himawk hi.
Tua manin Zomi te aw, i hun manpha mahmah mawk ei!
Inn sangpen EUREKA tung pan ka kumsuk uh ciang sikkhauluai (lift) pen
hatlua mahmah ahih manin i bil pen 'vil' sa in ging tuaituai a i pumpi
sunga blood pressure kikhek manlang lua hangin i khuazakna bang kilaih
man, nawngkaisak zo hi. Kahtoh lam hiin kumsuk lam hita leh tawmvei sung
bang i bil sungah 'cimci kai' hi.
Mitkha ah Melbourne khuapi sung kilang zuaizuai kawm in a nuai ka tun uh
ciang car sungah lut in luitui luang sialsial gei a Pak Huan (Botanical
Garden) sungah sing hoih hing dipdep huih in a mut ciang kisiing
deudeute mitsuan kawmkawm, mi vakte leh vasa lengte en kawmkawm in
Olympic Village lam ka manawh uh a, lui gollua hilo a luang sialsial pen
kantan in AUSTRALIAN OPEN a satna zel uh Rod Lever Arena Tennis Court
gei ah taiphei suak in Olympic Village gei a puakkeu a bang Stadium pum
kiukeu gei ah taisuak in khuapi sung lam ka lut kik uh hi. Khuapi sungah
Zu Bawlna mun, Cake Bawlna mun, Ann tuamtuam zuakna mun cihte lamgei ah
ka tuak pheiphei uh hi. Australia ah gam bel in a paite in a gamthu a
sinna uh innpi gei ah taisuak in... Box Hill ka kheng suksuk uh a,
Croydon pan Ringwood dong ka tung uh a, inn ah hong kha kik hi.
Zingsang niangdawn a pai sun anne, khuasung vaksuak pen nitak annek hun
madeuh in inn ka tungkik pan uh hi. Miliante mah bangin khe tawh
kipailoin Car vive tawh hong kivakpih cih ka ngaihsut ciang a khangto
gam, a nuamzaw gamte pen a omtak, a teentak himawk hi ciin ka ngaihsun
hi. A tung khinsate hampha a, a tung lai dingte zong enhuai kasa hi.
Zomi te i nopsak ni ding hong suaksuakta hi ei. Australia ah Vaak zong kang ta hiven. (Vaak thu bel dama gen ding maw).
(zop lai ding)
Hau Za Cin
Phuitong Liim
