Wednesday, May 8, 2013

Nute Ni Pahtawina Laigelh [Michael Hungpi]

“Nupi khat in ama nawi ateep Naungek mangngilh thei ding ahi-hiam? (Isai. 49:15).


Nu tampi lakah Nu-hoih kaneih khak  pen kalungdam mahmah hi. Citak, thu khual, thuman, itna tawh hong pantah toto in, hong khang cingsak hi. Nungak paktat pawl khatte gamtat siat danin Kanu, na-omkha  hizen leh mihing in piang khalo ding’ cih khawng ka ngaihsun khazel hi. Nu-hoih kaneih khak pen kalung dam mahmah a, Kanu ka-itna hong khang sak hi. Nu aw, Nathu-khualna hangin anungta kahih lam katheih ciangin zekai lua ta ing. Kakhan sung lungdam hong thuk zo kei mah leng, ka lungdamna hong theihsak in Nu Nu aw.

Nute hoihna simding hile'ng beihun nei in ka umkei hi. Laphuak siamte, laigelh siamte in, Nute hong itna leh ahoih nate uh agelh uh ciangin thuthuk thei mahmah in, hoih thei mahmah napi, tua thuhoih lahoih te'n Nute' hong itna genkhin zo ngei tuanlo hi. Kha sawm sung agil sungah dawmtakin hong kem hi. Leibeel tam thei dop bangin hong dawm uh-a, hong khuaiding alau man-un aduh khat  uh zongh nengamlo uhi. A kepcing hak mahmah Nausuah ma khasawm sung  hongkep banah gual tawh tanbang kim zawh nang'n hong khang liansak hong kem to hi.  Nute hong itna lianlua mahmah a, thukin zai hi. Gen zawh loh-a lain itna pen Nute' ong itna ahihi.

sung mangngilh ngeilo ding hi. Nu in anawi teep Naungek mangngilhlo ahih leh Ta Nute' Ni” bekin Nute, pahtawi ding hilo-a, nisim in, i-lungdamsak dending pen kisam kasa mahmah hi.Cik mah ciang'n Nu' itna kithuk zo ngeilo ding hi. Ahizong'n Nute damlai in, septheih bangin huhding thupi kasa mahmah hi. I Nute pen ameel uhhoihlokhawngpeuh in amau leh amau kingaihsun thei uhi. Ei, ongkhual man-un amel uh siatlawh, zawngkhal lawh, lungsim gim lawh uhi. Nu itlo zi it lo kua aom diam? Nupi khat in anawi ateep khat pen adam khempeuh in pianna Tun-Nu mangngilh ding ihi- hiam? Nute' damsung, it in kepcing ding thupi mahmah hi. Mipilte' kammal zat Nute pahtawina hong gelh nuam ing.

• Abraham Lincoln: Kumpi ka tun theihna pen ka nu hong patah hang hi.

• Bishop Thompson: Nu cih kammal sungah lungnopna om hi.

• D.L.Moody: Nu khempeuh kei nu abang hileh leitungah thong-inn omlo ding hi.

• George Herbert: Nu-hoih khat pen Sia 100 tawh kikim hi.

• H.Benson: Gal hangte sangin nu hoih manpha zaw hi.

• Napoleon: French gam ii ki sap in “Nute” hi.

• Rasa Wallace: Nau luai avei khut in leitung uk hi.

• R.A.Torry: Nu-hoih sanga zahtak huaizaw omlo hi.

• St.Augustine: Nute hong pia un, amaute zangin leitung ka kilamdang sak ding hi.

• Thimohty Dwight: Ka lawhcinna thusim pen nu hoih ka neih hang hi.

• Winston Churchill: Ka sia thupi pen ka Nu hi.

• W.W.Curtis: Mi nam khantohna dingin nu ii ngaihsutna zong kisam hi.

• Kap Do Thang: Nute hongit lam katheih ciang'n zekai luata ing. Leitungah Nute hong itna leh ahoihna uh tehpih dingdang ka mukei hi.

Nute pen Innkuan sung, pawlpi sung, khua sung, gamsung ah kisam mahmah hi. Amau omlo in kicinna bang mah omlo hi. Innkuan khat sungah Nu omlo khat ngaihsun dih in!  Nu omlo Innsung pen a-ap, nintawh kibang hi. Ki-manna aneilo na tawh kibang hi. Solomon in, "Numei tam mahmah napi Nu-hoih ngahna ding haksa mahmah hi", cihi. Tua ahihman in, Nu ahi-nailote leh Nu ahi-sate in, "Nu-hoih pen kuate ahi-hiam?" cih ngaihsut huai kasa hi.

Nu-hoih in Innkuan sung puahin zem hi. Sanggam u leh nau sung itna khangsak hi.Thu hoihlo pel hi. Nung leh ma itsiam in, kilemsak hi. Mi gensiat cih neingeilo hi. Anunglam sai sisu lo-in, ama khuat hi. Angsung khuallo in, makaih siam hi. Nu cihpen bangzah in thupi hiam cih leh, Gentehna in, Kalamkiatna gam (Motherland), Kapianpih kampau (Mother Tongue/Language) cih bangin Nu-hoih in ciaptehna ngah hi. Pianna ka Tunnu' hongitna leh ongkhualna bangzah in thukin, gil-a, bangzah in hoih hiam?

ACADEMY ANGKAWI

Tembang lungdeih kawineem ngaih tawh,
Tuibang gawm ma holung kikum, 
Umbang khawlkhawm nuihciam lelzel, 
Singdang englo nun nuam khawlkhawm.

Solkha tangnuai mawngbang kikawi,
Khawl khop cimlo taikhua  valzel,
Nun in nuam ee sang bang kinoh,
Ngilh ni om diam len lai hun nuam.

Lungtup deih geel  tuibang kigawm, 
Maciang suan khawm heina peuh ah,
Sakmel etlawm duang  kuai angkawi,
Lai lung muanna, tang bang dam sung.

Sian thupha sang’ vonnih thum tawh,
Laikuang umkhawm sanmun muang ta,
Sakmel duanghoih tongdam khum pen,
Academy angkawi paakbang kong tawi. 

Note: Zua-Pa' Tongdam Awnem 

Gelh: Kap Do Thang 
Date: Wed, April 25, 2012.

TUN-NU' BANZAL

Hongcing hongkem hongvil den tawntung,
Lamhong lakden Tun-Nu' banzal,
Luai naubang khim laikhun tung bang,
Zaitha khauhsak Tun-Nu' banzal.

Tuanglam sikkhial  pukloh nang’n,
Honglen hongkem Tun-Nu' banzal,
Naubang kap-in luankhi  kiat ciang,
Hongkhem hong nulsak Tun-Nu' banzal.

Sung gilkial in, Naubang  kahciang'n,
Sungnek lim  pia Tun-Nu' banzal,
Omlai veileng  tangbang dam nang'n,
Hongcing hongkem Tun-Nu' banzal.

Gelh: Kap Do Thang
Date: Wed, April 25, 2012.

TUN-NU' NUUNKHUM

Vitamin hoih pen tTun-Nu' nuuntui
Zaitha khauhsak tangbang damsak
Cingtui  tamsak mel hoihsak,
Lim pen sungnek Tun-Nu' nuunkhum.

Kilbang khangsak Tun-Nu' nuuntui,
Vabang pilsak hong cimsak pen,
Sung gilkial sim, annbang kimuam, 
Limpen siktui Tun-Nu' nuunkhum.

Sesum  paai tawh, lei theih hi lo,
Bangmah peuhtawh khek theih hilo,
Cikmah ciangin loh zawhloh ding,
Amanpha, amanpha, Tun-Nu nuunkhum.

Gelh: Kap Do Thang
Date: Wed. April 25, 2012.

TUN-NU BESAM

Besam besam, Tun-Nu' besam,
Etlawm etlawm zaam zilzial e,
Duang akuai, Zua-Pa' ading'n,
Etlawm etlawm Tun-Nu' besam.

Zua-Pa' zuanna Tun-Nu' besam,
Maimit laukha  luaiden sak e,
Duang suah paakbang a-etlawm sak,
Etlawm etlawm Tun-Nu' besam.

Gelh : Kap Do Thang
Date: Wed. April 25, 2012.

TUN-NU' ANGLIIM

Zalna nuam pen Tun-Nu' angliim,
Itna tongdam kam khum kiza,
Nun-in nuam e, singdang englo,
Limbang belhcing Tun-Nu'  angliim.

Limbelh phungcing Tun-Nu' angliim,
Lailung muanna lambang pakna,
Zaitha tawldam, nunin nuam sa'ng,
Haibang ngak la'ng Tun-Nu' angliim.

Tun-Nu' angliim lailung damna,
Kilbang khanna sencil panin,
Sinthu khing hoih kimuapna mun,
Saumang nuam pen Tun-Nu' angliim.

Gelh: Tg. Kap Do Thang
Date: Wed. April 25, 2012.

TUN-NU' ITNA

Tun-Nu'   itna bang ahi-hiam?
Tehpih ding bei, sim leitungah,
Tangbang damsung sutzawh loh ding,
Tun-Nu' itna, Annbang itna.

Itna  bukim Tun-Nu' sungah,
Selung mawl hang'n, hong maisak den,
Nunna na ngawn hong kipia ngam,
Ngilh zawh loh ding Tun-Nu' itna.

Hong kem  khiallo hongit manin,
Omlai vei in, sung gilkial  ciang,
Doctor te' sang’  kepna kicing,
Thuh zawhngeiloh  Tun-Nu' itna.

Gelh : Tg. Kap Do Thang
Date: Wed. April 25, 2012.

TUN-NU' SAKMEL

Singdang lun tawh tanbang teh kim,
Tun-Nu' duangsuah sakmel etlawm,
Lambang paakna gual anglai pa'n,
Tun-Nu' duang suah,Tun-Nu' sakmel.

Zoheisa bang paalhoih Tun-Nu,
Etlawm zunsiam Star hoih pen,
Zatam lak pan ahoih pen ci’ng,
Tun-Nu' sakmel, Tun-Nu' sakmel.

Tun-Nu’ awhkhi  sakmel lawm sak
Tungsun-ni bang'n tang silsial e,
Lel zawhloh ding Tun-Nu' hoihna,
Etlawm hoihpen Tun-Nu' sakmel.

Gelh : Tg. Kap Do Thang
Date: Wed. April 25, 2012.

TUN-NU' AWNEM

Vondeih  ngaihmin,  theibang lawh sim’n,
Tongdam awnem tawh, hong samden,
Bawi aw, tawng aw, theibang minlo,
Tun-Nu' awnem, ngilhni om diam?

Kil bang khanna’ maimit siing nang’n
Hong khim  diaidiai tuunnu aw neem
Zalna luai tung nau bang kah ciang’n
Hong khem tongdam tuunnu aw neem…

Gual tawh tanbang kim zawh nang’n,
Sinthu khing-annbang hong muanden,
Vabang pilin kilbang khan nang’n,
Zaitha hong guan Tun-Nu' awnem.

Gelh: Tg. Kap Do Thang
Date: Wed. April 25, 2012.

TUN-NU' ZAITHA

Zaitha patbang anem zong’n,
Vondeih itman giautau ngeilo,
Tang nisa nuai, tuzong khawllo,
Hongit hongkem Tun-Nu' zaitha.

Khakua sungbang, hongkem laigil,
Pheiphung suanna zaitha nem zong’n,
Annbang itman, lobang khual ma'n,
Phelbang khauhsak Tun-Nu'n zaitha.

Sialbang lianlua Tun-Nu' itna,
Sitlo zaitha, vondeih ading'n,
Omlai vei zong, hong thuakpih den,
Tun-Nu' zaitha ka zaitha hi.

Gelh: Tg. Kap Do Thang
Date: Wed. April 25, 2012.

Hih atunga Laigelh pen, Tg. Kap Do Thang hi-in, Zampi Khua, Tonzang Township, Chin State, Myanmar ah suak hi. Nu leh Pa zahtak in, naute pattah siam Uzaw khangno khat hi-a, Khua leh tui it-in, Minam thupisak a etteh huai khangno khat ahihi. Spicer Memorial College pan, 2013, March Khasungin, Bachelor of Theology ( B.Th ) Qualify takin ongzo khia hi.

Ama' nuntakna sungah aphutkhak haksatna leh thuaknate La in phuak-a, "Sakmelhoih" cih New Albums abawl laitak ahihi. Asawtlo in, ong kihawm khia zihziah ding hi.

Posted by,

Tg. Dal Sian Hung
Owner/Director
Zomi Foundation Home Mission
Kuala Lumpur, Malaysia.
Mob: 011-1573-1275/016-355-4469.