Education Department"
Attachment tawh kongkhak pen ka download thei kei, hong gelh ngiatngiat in nong cih banga kong gelh ngiatngiat hi. Kua gelh hiam zong thei keng. Pr. Kenneth in zong ka download thei kei hong ci-a, attachment file ka bawl pen kisam hi kha in um ing. Hong thuum ing. Na lai gelhte a vekpi mahin sim ing. Lungdam huai hi. Topa in cidam khansau na thupha hong pia hen. Lai teng anuai a bang hi.
Nginkok
*******************************************************************
Subject: Amaanlo thu pawl khat puah phatna
Thupatna: A beisa hun internet pan in thu pawl khat ong kihawmkhiate lak pan aman lo zuau thu pawl khat kihel ahihmanin athei nuam, a tel nuamte adingin a hong kihawm khia ahi hi. Amasa in sum thu tampi tak kigelh ahih manin tuate ih gen dinga, thu dangte a nunglam ah in zom ding hi.
1. Sia Mang Za Lian leh sum Thein 50 cih thu tawh kisai in
Sia Mang Za Lian in Conference ah tein 50 pia lo hi, amah dong un cih thu tawh kisai pen thuman ahi hi. Sia Mang Za Lian in tein 50 pia ngei lo mah hi. Apia pen Yangon Conference pawlpi hi. Yangon pawlpi in a sumpi puak uh lah sawt khin ta, Receipt lah ngah thei lo uh ahih manin Conference zum phone tawh a dot ciangin Pa Khual Za Nang a dam lai hi in aman phone sang hi. "Sawm-a-khat tein 50 kong khak uh ngah lo maw tu dong ciang receipt lah hong khak lo? ci-in a dot ciangin Pa Khual Za Nang in (Sia Dal zi) Ciau Cing dong hi. “Kingah in na zang pak ing, Tedim va zin pak ning in kong ciah ciangin hong ap ning” ci hi. Tedim va paito hi, hong ciah kik hi, sum pen ap tuan lo hi. Kaal khat khit ciangin Pa Thang Lian Khup Conference zumah pai a, Yangon pawlpite sawm-a-khat receipt khak ni, ci-in a gen leh zum a ten tua ahih leh a sum hong ap khin maw ci-a a dot ciangin, “a sum bel ong ap tuan nai kei” ci-in dawng hi.
Tua ahih leh a sum lo-in receipt kipia thei ken teh, na cih san hi. Khat vei pai kik leuleu a, “Yangon pawlpite receipt ih khak kei leh hong khasia leh uh hoih lo ding hi veh aw” ci-in va gen leuleu hi. A sum ong ap khin hiam? a cih teh, ap nai kei, ahi zongin “kei man tavuan khan ning” a cih ciangin a sum om het lo-pi in receipt piakhia uh hi. Yangon pawlpi in a lung nuamlo in phone tawh a dot masiah bel Yangon pawlpi sumpi khiat lam a theihpih kua mah om lo hi. Sia Kai Dal te nupa in lah imcip bikbek. Pasian awi loh hi ding hi ven, a kelluphum hong kidawk cih ding hi.
2. “Lal Cin Kham in sumpi tein 11 conference ah khak a, Sia Kai Dal in Carbon thuah lo-in receipt khak hi” cih pen thuman hi-a; Pa Khual Za Nang tungah phisian khitsa hi cih pen a zuau hi. Tua carbon kithuah lo, a mal kisuak a kimuh ciangin Pa Nang in Sia Kai Dal zi Ciau Cing kiangah dong a, Ciau Cing in zong gen kei sam. Asak a khang a kiim apaam teng gen acih-a gen. A nunung ciangin Pa Khual Za Nang in, tun a sumte kaw om ahia? acih ciangin “Pa Khup (sumkempa) tungah ap khin ing” ci-in dawng hi. Conference sumkempa Thang Lian Khup kiangah a kidot ciangin ken sum hi zah hong ki-ap lam thei keng ci-in dawng kik hi. Hih pen 2005 kum kipat lam a thu piang hi. 2007 kum April kha sungin Conference sazian sitte in sum sazian sit uh hi. Conference a kipat a kipan amau sazian sit hun dong pen receipt bu a om khempeuh ngentel tak in sit ngiatngiat uh hi. Hih tein 11 te a lutna mun khat bekah mu lo uh hi. Tua ahih manin sazian sit makaipa Dam Khan Pau in, Pa Thang Lian Khup kiangah “hih sum tein 11 pen nang tungah hong ki-ap mah hiam?” ci-in a dot ciangin, “ken hi sum ong ki-ap lam thei keng,” ci-in dawng hi.
Tua ahihmanin receipt bu sungah a lut khinsa ahi manin carbon thuah kik nawn lo in receipt pia hi” ci-a a laihawmna vuah a kigelh thute zuau phualselna ahih lam kitel cian mahmah hi. Amau gelh banga sazian lutsa hi le bel, sazian sitten mu mahmah ding uh hi. Pa Thang Lian Khup zong dot kik kul nawn se lo ding hi ven. Pa Khual Za Nang a dam lai-a a phisian sa, cih pen amah asi-khinsa thu kidong thei nawn lo ahih teh, ci-a zuau selna dinga, apaulap pong mawk hi lel. Pa Thang Lian Khup genna khat ah, tu hun ih thu leh buai neih, Mission lam ten hong khiatkhiat lai takin hi bang khawngte pulak ding hi kei ci-in sazian sitte mai-ah gen hi.
3. USA Daltawng in Pa Dam Khan Pau tungtawn in sumpi tein 20, Conference ah pia a, tua sumte pen Pa Pau in conference ap lo hi, cih pen mipite mai-ah mitphial lahna hi cih thei ni. Daltawng in conference ah sum hi zah khia ngei peuh mah kei, pawi a om teh tawmtawm kihel thei mah. Amah zong dot kul bek kei. Pa Dam Khan Pau pen 2006 kum sung Myothit (Pangpi conference) pawlpi sum kem hi. 2006 Quarter 3 na leh 4 na sumpi a ap loh vai hi zaw. Khat vei sum ap ding in zumah pai aa, a sum sazian teng zum na semte tungah pia hi. A sum sazian tein 20 bek hi dek lo, a val tham pen receipt bu sungah gelh sak hi. Koi leh pa Pau, “na sumte sim ni ei, a cih leh, sum om nai kei in, a om peuh ciangin hong ap kik ning” ci-in dawng hi. Tua ahihmanin sazian len te’n receipt bu sungah min thuh lo in a receipt dal zong eukhia-lo in tua bangin koih hi. Tua ahihmanin Pa Pau in receipt dal khawng hong lah khiat leh a tuh hi pah ding hi. Daltawng dot ding hi lo-in, Myothit pawlpi upate dot ding hi zaw, hong gen thei un teh.
4. 2007 kum conference khawmpi tawh kizomin MMCC Graduation pen thupi takin kibawl hi. Tua sung pan a thupi diak khat ah Marching aman khit ciangin sangnaupangte sung panin khat pahtawina pia uh hi. Mun dang sangte ah pen tua bang pahtawina ngah sangnaupang khat ii hoihna tuamtuamte banah a laihuanna pan a mark hoih a ngah nate pulaak uh hi. Ahi zongin tua ni a pahtawina a piak uh pen bel Nu Siantawng (Sakollam Pa Tawng Nang monu) hi in pahtawina a kipiakna thu akigen tak ciang mark hoih cih te kihel lo, MMCC a dingin USA ah huhna hong nget saka, sum tein tampi hong ngah sak ahih man in lungdamna tawh pahtawina a kipia ahi hi, ci-in hong pulak hi. Hih sumte tawh kisai in USA lam pan a gen dan vuah, MMCC huangsung ah tui tha tawh mei bawl nading, huang sung leh huang pua lampi puah nading akipia hi, ci-in kiza hi. Lam khat panin conference sazian sitte in huhna sum bangzah pha a, bang mun teng ah kizang hiam? cih pen thei lo uh hi. MMCC sazian leh President sumzatna kisit thei lo ding hi ci-in gen uh hi. Tu ni dong ciang MMCC huang sungah tui tha tawh mei set kibawl lo, mei tang nai mahmah lo hi, huang sung huang kiim lampi te zong bangmah kipuah lo kibawl lo, aki lamdanna bang mah om lo hi. Conference sum pen sazian sitten hoih takin sit uh a, committee thukim na tawh sum kizang hi a cih hangin sazian sitte lai bu Ledger bu sungah MMCC te sum zatna sazian mal khat zong kihel nai kei, en le cin mu ni teh, sazian sitte theih sun sun tem ah zong ahi bang a mipi mai a pulak ding zong phal lo lai. MMCC sangin appropriation budget a thohna mantakin kigelh a, a zatna mahmah kihel lo hi.
5. (a) Lai kihawmnate ah SDA pawlpi buaina cih pen laihawmnate ah kimu thei hi. A taktak in SDA pawlpi a buai hi lo-in, a pua lam pan a mite buaisakna SDA pawlpi in a thuak hi zaw hi. SDA pawlpi in a pua lam mite tawh vaihawm khop ding leh Phisian ding bang mah nei lo hi.
(b) Gupkhiatna pen mimal leh Jesu kizopna hi a, GC tawh kizop mana gupna ngah hi lo hi, cih kammal pen tu hun laihawmte ah laang mahmah hi. Ih theih ciat mah bangin gupkhiatna pen Jesu upna tawh kingah hi a, tua mah zong Pasian nasep mah hi. Khuatual pawlpi a phut zong Pasian hi a, leitung bup thu-um mite kipawlna, kipumkhatna zong Pasian vaihawmna mah tawh akiphut ahi hi. Hih pen Kha Siangtho makaihna ahi hi. Tua ahih manin hih thu-ummite kipawlna a dawldawl te pen a thupi leh a kisam vive ten a hi uh hi. Tua ahih manin hih kizop dimdiamna khawngte a neuseh, a thusim lo ih cih te bel SDA pawlpi mite hilo in, pawlpi dang tuamtuamte paid an, sepdan pan a gingkhia, a kisem khia hi zaw hi cih tel ding kisam mahmah hi. Lai Siangtho sungah Pasian khat, upna khat, tuiphumna khat (Eph. 4:5) ci-in kigelh hi. A hangin Jesu hong honpa khat bek hi. Jesu nih leh thum pha lo hi. A paikhia bel a om ding mah hi. Tua manin Lai Siangtho ah a cianlai pawlpi cih kammal na kigelh hi zaw hi.
(c) Tua ciangin van thak leh lei thak ah SDA pawlpi ahi lo, ih theih ngeilo mi tampi in gupna ngah uh hi, tua ahih manin Seventh-day pawlpi bek gupna ngah theihna hi kei, cih danin kamsangnu genna tawh kizui in thu kileh gente mu thei hi hang. E G White in hih bangin lai a gelh laitakin bang teng siksan-a gelh ahi tam maw? SDA langpang mai dingin Jesu sang peuh leng gupna ngah ni teh a ci ahi tam? Ei deih dan in bel kikai thei mah in teh. Ahi zongin gupkhiatna thubu cing a za nai lo, thei khalo ahih hangin a muh a saan uh thumaan khuavak kiptak-a len a, a nuntak pihte a genna hi zaw lo dia ma taw! Tu hun a mi pawlkhat te in mi muhdah man peuh Kaziante muhdah man peuh, Sihzang, Teizang muh dah man peuh a conference min pua a pawl tuam phuan te khawng a gen na hi peuh mah ken teh.
6. Mission siate Egypt sabeel lung gulh a ciah kik, ci-a lai kigelhte zong ih muh sa, ih theih sa ahi hi. Hih a kigen Mission siate in bel tu-aa conference min pua makaite pen (1) thuman a gen ding sakha, (2) Conference a deih taktak mah sa kha, (3) a kum khawng ciang tan in tua ni tua hun ciang Conference kingah ta ding hi ci-a, ami khem khemna teng khawng uh um kha uh hi lo dia? Tu na ngawnin zong tua pen lung nuamsak mah mah, lungkim sak mahmah lai mawk hi ven. Hih a kigen Mission siate lametna bel hi bang a hi ve:
Confrence makaite pen kha mi mahmah dingin Conference dinmun man hong pia thei ding section, union, Division makaite tawh khut kilen ding uh in, mai-et akul leh zong mai-et zaw mai ding in (a leh do zawzen sang) thum a kul leh zong thum mai ding, Lai Siangtho sunga meigongnu thunget dan-a kigen bang ding, kiniamkhiat a kisap leh zong kiniamkhiat dingin conference dinmun man ngah takpi ding a, a lamen uh hi ven, a hih hang amau lametna pen conference makaite gamtat dan tawh kikelki lua hi mai, conference dinmun man ong pia thei, hong vaihawm sak thei ding te sang a, kiliansak, kipilsak zaw, kitheisak zaw, a pilpen, a siampente bang a om liuliau, hong pia thei ding makaite thusim lo lua kisa, zunko ekko, uiko, aak-ko a ko, laihawmna khempeuh ah policy, church manual, a laimai bang gelh zihziah uh, tua a hih leh hih banga mi mawhna a kawkdente gamtat dan, vaihawmdan te e leh? Pawlpi mi (worker) hi lopi khat in President, sumkem, Secretary, cih bangin kiseh uh hi. Ordain Pastor gengen loh sia min zong a pua nai lo khat in ordain pastor khawng pia meng meng, (Gentehna in, Pastor Hmunling, Pastor Paulek). Hih te pen akoilai policy pan aa a lak ahi tam? Hi bangin pai toto in a nunung pet pet ciangin SDA huang pua hongtun pih uh hi. Mission siate pen SDA pawlpi pan apaikhianuam, a tawpnuam, hi zenzen lo hi ven. Tua ahih manin maizum huai mahmah phial ta se leh, mite zahkona bang zah takin a thuak phial ta zongin “maitang singhawng a nei” a cih bangin maizum zahhuai te zong khual zolo in, lawki dinmun a om liang sangin, ei omna pan leitung bup SDA pawlpi tawh kizopna lampi ahi Mission ah a kileh kik uh a hihi.
Kong it sanggam u leh nau te aw, ih conference makaite omdan kalsuan dante en dih ni. Conference dinmun man ngah ding a deih, a lamen taktak mah hiam? Ih gensa thu te lung ngai leng amau omdan kitel mahmah pah lel ei mate! Conference man a deih taktak te a hihloh lam-uh telsiam ni, Conference dinmunman ki ngah ding hi leh zong a khasia mah mah ding te hi zaw. Bang hang hiam cih leh a utut vua sawk thei nawnlo ding hiven. Ih makaite pen policy a tel mahmah te hi-in SDA pawlpi pua lam pan in conference, Attach field cih te kingah ngeiloh ding ahih lam thei lua uh tel lua uh hi. Mit-hak sinsen mah aa, conference kingah dek ta ding ci aa, tu na ngawn aa hong khemkhem te hi mawk hi. En zong lah bangmah ngaihsun nawn tuanlo in umsuk pah, lungkimsuk pah peuh, makaite in ekne leh enzong ne ding maw le? Hi bangaa pil sensan pi aa hong khemsuk hong khem tohna pen thu dang tampi om lo, na sumpi pua ding a lametna uh hi lel. Pasian hong piak na thupha sung pan sawm a khat na puak te akuama saipih kul se lo aa, amau deihdeih aa, a zek teng uh pen makai pawlkhat te bangin bel conference hi khin ta hang a ci uh hi mawk hi ven. Amau lung hihmawhpi pen bang ahi tam? Na theihsa bang in na sawm a khat te sumpi tuamtuamte na puak loh khak ding bek hi lel hi.
Kaziante khawng gen siasia pong mawk, amau in bel kum 100 val sitset ih gam hong makaih khin uh hi. A pai khialhna, a manlohna uh na theih zahzah gual to sin aw, amau zong mimah ahih manin khial thei mah in teh, ahih hang tam vetvat sam ken teh, ih gam ah ei thu aa conference ih din zawh kum 10 pha nai baih lo pi, ih pawlpi policy bang aa, a kalsuan na uh gen theih ding khat bek om kei, ei leh ei kisit-tel thei hi leng, ih gamtatna sa te enkik thei le hang, conference dinmun ding aa zong kilawm vet lo, makai ding aa zong Pasian’ khutzat theih ding te ih hihloh lam kiphawk huai, kitheih huai hi. Conference dinmun man deih aa kipekpek ih sak khak ding lau huai. Tuate a lung ngai hi zaw lo-in hih kipawlna pen sum zonna mun, company ahih keh Business centre bang aa angaih sun ahi hi. Lai a hawm na khat ah gam dang mun tuamtuamte ah ei sang pawlpi mi tawm zaw pekpek ten zong ci in (a nambat gual zihziah in) conference ki pia hi ci-in limgelh thei mahmah hi. Hih a tawmno khat tawh conference a kipiate, a ngah te, ih et ciangin, disband/disfellowship a kipia khat bek om lo hi. Ei conference te bel a ki disband sa ih hih manin leitung bup SDA pawlpi tawh a kisaina them zong nei nawn lo, Baptist, Methodist, cih dan pawl tuamtuamte bang hi lel hang. Khatvei tak ciangin UMM pen Conference dinmun man zong hong kipia thei mai tak. Hi phial mah ta leh zong tu aa ei thu aa conference ka hi uh hi, a ci te tawh pen kisai-na om lo lailai hi ven. Hi bang mahin tuam om den ding mah lungkim lai ding maw?
Tua ahih manin sanggam aw ih makai ten conference a sawt lo-in kingah ta ding hi, lung himawh ken, hong cih ciangin lungkim suk pahpah kenla, conference a hong pia ding kuate a hia ci-in dong le cin a man tel thei pah ni teh. Jesu tawh kizom peuh leng GC tawh ih kizoploh hangin gupna tanna hi kei hong cih teh zong ahi mah hi, cih pah ding hipeuh mah kei. Hih kammal pen pawl tuamtuam a phuan/a sat pawlpi tuamtuamte kammal zat hi. SDA te kampau dan ding hi kei ci-a na phawksiang ding kisam mahmah hi. SDA min pua in a-tuam-a om ding phamawh sa lo cih pen, Pasian’ Kha Siangtho makaihna ahih loh lam kilang pah hi. Ih pawlpi makai te, ih siate thu, ih nial gawp ngamnate, ih kosiat gawp ngam nate pen khalam picin lohna ahi hi. Absalom in a pa David a do laitakin a kipat lam bel a mapai ding tawh kibang sam napi in Pasian in ompihlo ahih manin a sawt lo-in kisiamang pah lel hi. Kamsang Samuel vaihawmna a ngak zolo ama thu bang aa a gamta, Saul nuntakna zong tua bang mahin mainawt vet lo hi.
SDA ahi lo pawlpi tuamtuamte pen amau ut bang in kizopna bawl thei uh hi, ahi zong in SDA pawlpi pen tua bang hi thei lo hi. Eimau om na gam Section, Union, Division bekmah tawh kizop theih hi. Hun khat lai-in conference lam panin Mizo conference ah sumpi puak dingin palai pai sak uh hi. Ahi zongin Mizo conference in sumpi pen sang nawn lo uh hi. A hang pen Division tuam ih hihna hi aa, a nih na ah kawlgam aa conference minpuate pen leitung bup SDA pawlpi in a disband sa ahihman a hihi. SDA pen leitungbup innkuan khat ahih manin kawlgam Union ii khensatna pen leitung bup SDA kipawl na zum khempeuh in a pompah uh hi. Ih sumpi pen Aizawl aa puak ding hi kei-in, ama lampi a om sa Section zumpi Pyinoolwin aa puak ding hi zaw. Tua ahih manin sanggamte aw ih gam leh ih minam aa dingin Pasal tat ding pen hoih mahmah sam naven, ih Pasian leh a pawlpi aa dingin pasal tat leng Pasian’ maipha ngah zaw buang lo ding ih hi hiam? SDA pawlpi pua aa om ding lel in pasal tat dah ni, zong kisam kei, kul mah mah kei, ih Pasian leh a pawlpi pen minam khekna in nei dah ni, minam pen Pasian pian sak hi-a, a piangsakpa sang in a piansak nate thupi sak zaw dah ni.
Itna leh deihsakna lianpi tawh
Adventist Thangho
----- Original Message -----
From: Thang Siangh
To: Education Department
Sent: Friday, April 04, 2008 6:35 AM
Subject: Re: Please open the attach file.
Ngin Kok ka downroad hang hong suak mahmah kei veh e, tua laikhak mahmah hong khak ve, ahih theihl ding leh. Khen ngiatngiat inla hong khak dih ve thupi ahihleh.
Education Department
Dear Sanggam Zomisda te
April 3 ni in, Laito pan lai khat hong tunga, ka sim leh, eimi te sim theih dinga kihawmkhia lai na hi in, tua lai hong khak sawn hi'ng. Tel hak, sim hak pian na ven, sim sim le hang kitel veve sam hi.
Topa' thupha
Suak Khaw Ngin
Director
Department of Education, Myanmar Union Mission of SDAs
PO Box 977, GPO
Yangon 11191
MYANMAR
Phone: Office 951 371757, 371758 [Ext. 18, 19]
Residence 951 371759
eMails: ngin.sk@gmail.com, myumedu@mail4u.com.mm
No comments:
Post a Comment
na utut suakta tak in at in, phattuamna om ding hi.