Zomi uleh nau,
Ahun cingta ahihman in Zomi bup tung ah kong cial nop khat omhi.Pasian in mihing abawl cil in ama lim leh mel sunding in ong bawl ahihlam Lst sungpan ihthei kim ciathi.
Mihing abawlna in hih piansakna te khempeuh acing akeem ding leh piansakna lak ah athupi pen aa ong bawl hi-in, piansakna khempeuh zong akilem taang ding aa ong bawl ahihi.
Satan khemna tawh Piansakna teng apiangsakPa deihna banglo in ong kisia aa, atapa Topa Zeisu hangin damdam in angei ong bang kik ding ahihi. Leitung gam tampi in damdam in ong piangsakPa lim leh mel pua toto hi taleh Zomite pianna Kawlgam in tuni dong lim leh mel neilo in, lim leh mel pua nailo hi. Painsakna thuthuk bulpi sukha nailo ahihi.
Apualam piansakna, leitung vante thupi sa zaw in, angsung theihna, min leh za, leitung nopsakna sung ah kibual laihi. Tuate hang in Kawlgam-Eden huan in ling kung tawh kidim in hazaatna, kitot kiselna, kithahna, kahna leh hagawina tawh kidimhi. Athahatte gualzo in, athanemte simmawh hi. Angsung lungsim lian in huaihamna tawh kidim hi.
Banghanghiam cihleh Piansakna ih thuthuuk akitheih nailoh man ahihi.Piansakna ii deihna, akhiatna theilo ihihman in ihgam ihlei in tentheih nading hinawnlo in lingkung lak abang ahihi.Tua ahihman in tuni tuhun aa Zomi te'n, Piansakna thuthuk ih taangko ding hunta dinghi ci-in upna kanei hi.
Bang ci taangko ding?Tutak in Kawlgam ah US$100 tawh Lungdamna thupha puakna Mission field khat ki sem zohi.
Zomite tu laitak Gamthumna, ahau gam atungsa tul 10 aa sim in om khin ding in ka lam enhi. Tulian ih om naikei zong in maikum sung in omta ding hihang.Gamthumna atung khat in kha khat in US$1000 angahlo om in ka um keihi. Khakhat US$1000 angah khat in asehsuah mantak pia leh US$100 hipah aa Missionary khat puakzo hi. Mission field khat kipan zohi.Zomi khat in Mission field khat nei hi lehang Mission field 10,000 akinei zo ding ahihi.Sem phot, panphot hi lehang kikhawl theilo in kibehlap nuam semsem zaw laihi.
Banghanghiam cihleh supna om zawlo ahihhang ahihi.Zomite ong piangsak Pa in hih dingin ih minam ong deih hiding cih siangtak in katheihi.
Kawlgam ah tutak Mission Field 10,000 tawh kipan hi lehang, Kawlgam in asawtlo in Piansakna thuthuuk ong theiding aa, Piansakcil lim leh mel ong pua dinghi.
Tuni ciangdong tenzawh nading hilo, ten theih nading hilo ih taikhiat ngeingaina in Piansakcil lim leh mel ihpuakloh man, gambup in Piansakna thuthuk ih theihloh man ahihi.
Piansakna thuthuk theisak peuh lehang ki-itna ong khang dinghi. Kilemna ong pung dinghi. Ki thutuahna ong meng dinghi. Ki deidanna, kisimmawhna, kihuatna ong kiam ong bei ding hi.Kawlgam ah hih Lungdamna thu e'n ih taangko keileh kua mah in taangko loding aa, kua mah in taangko kei leh ihgam ihlei tungkik nawnlo ding hihang.Tua ahihman in mimal khat ciatin,
Kawlgam aa Mission nasep ding thupi ngaihsut in sep kipan ta lehang cih kong hanthawn nuamhi. Akipawl theiteng in sem khawm, vaihawm khawm in, kipawl khawm nuamlo te'n khatguak septheih luat thu ahihi.
Alom alom aa gamthumna alengkhia Zomite ka etciang in ihtunna gamte'n ong zat nading mahmah ka mu het kei aa, zat theih ding zong hilo ihihhang, ongmuak, ongsang, ongdawn phial mawk uhhi. Gamhau, gamlian, akhangtosa gam khempeuh in Zomite hang in hailawh phial kasa hi. Hihpen Topa gelna hiding in ka umhi. Topa deihna om ngelngel ding aa, tua in Lungdamna taangko ding - Mission nasep semding aa ong deih hiding cih simloh adang om in ka um keihi.
Tua ahihman in ihpianna ih Zogam, ih Kawlgam lim leh mel pua sak kik dihni, cih kong hanthawn nuamhi."Lungdamna Thupha puak asemlo akipiangsak pa in akipiangsak khialkha hiding aa, atolh ahihi. Banghanghiam cihleh hih nasep in Topa sawlna, sih vaikhaak kam ahihi. Hang Khan Lian
