Lengtong Kam Khen tawh holimna

(Nb: Hih kihona pen Lengtong Kam Khen thukimna tawh ka phawk pak teng hong khah khia hi ingh.)
LK - Lengtong Kam Khen
ZQ - Zomi Quavadis ( Francis Lamthang)
  Pu Lengtong Kam Khen pen eimi ansai minthang Awngnandaw ah a hawhnop hun leh kei hunawng neih kituak kha ahihman in ka kizui pah uh hi. A tunna ZAM office( Malaysia)  pan China Town lam tawnin ka khepai pih phei kawm a ka kihona uh hi. Amah pen ZCD President Pu Chin Sian Thang tawh Malaysia ah Zomi Namni mang dinga hong ton uh a hihi. Mite'n Lengtong Kam Khen pen Zomi mipilte laka  khat hi ci uh a, kenzong amah tawh ka kikholh ni akipan  thuthang khempeuh up loh gaih ding ahih lohlam ka tel hi. Pu Lengtong pen a kithawidan leh a kammal thu thukte hangin Zomi leh Zogam a it khat hi cih kilang a, Pu Chin Sian Thang nung a zuih lengleng ka muh ciangin Lengtong Kam Khen pen mipil hi ciin ka kipsak hi. Kihona kipan ta ni.
ZQ: Pu Lengtong aw nang pen tutung in a hehsa in Malaysia leitang hong sik danin na za ing. A himah maw?
LK: A heh lua bel hisam keng. Vanlengtual a hong vaidawnte lakah T.S Khai mu lo ka hihmanin a nuam lo hi ingh. Amah pen Malaysia ah kei hong dawn dinga kei maiah ka paisak hi.
ZQ:  Zangkong a Zozum tawh kisai tawm hong gen dih ve.
LK: A minthang mahmah Zangkong a Zozum pen eimi gamdang pai dingte vai aki hawmsakna mun hi. Kala niangtui sai sunga om ahih hangin asai neipa in tuni ciang dong ama sai sungah Zozum a om lam thei nai lo hi. Hih Zozum ah hong maingal lote a tamzaw pen Pastorte hi. Zum hong kahte lakah thu tam agen penin niangtui man teng apiak gaih kul hi. Tuapen Zozum bylaw khat a hihi. Vum Nang zum hong kah simin kam tam pau pen den ahihman in kisuang sim hiding hiven niangtui man teng pia pahpah hi. Tua kipan bylaw khatin kizang suak hi. Zozum ah sum anei lote kam tam pau thei lo cihna hipian pah hi. A lungdam huai khatah Zozum pana khang khiate peuhmah mi nuaiah om lo uh a, khalam leh leitung pilna lamah khanglo zo lian uh hi.
ZQ: Amen. Tua leh tukum ko innkuan ading in kumpha hi nacih pen bang hang hiding ahia Pu Lengtong, hong gen dih ve?
LK: (nui phot zawzen hi) A khatna ah kei pen ka omna pawlpiten President mun hong luahsak uh hi. Topa'n muan ding midang mu zo nawn mahmah lo hi'n teh maw ciin ka sang pah lel hi. A nihna ah ka tapa Singpi in tukum sungin M. Div. hong ngah hi. A thumna ah ka tanu pen ko veng sungah makai khatin kikoih hi. Hiteng hangin tukum pen ko innkuan adingin ka zakhan kum uh hi a ci hi'ng e.
ZQ: A lungdam huai himawk mah ei mete. Na tapa in M. Div ngah mawk cileng inn tung lecin lopsak ngel ding na hih teh Zozum makai teng samkim buang niteh maw Pu Lengtong?"
LK: Sap kul buang mah lodia, sam kei leng hong bum nuam ding uh hiven!
ZQ: Hehehe hong bum nuam khong mah incia mete. Tua leh na "Khuasiam" khui sunga " Heh hong nem aw " pen nang phuah hin teh maw Pu Lengtong? Laphuah siam hong sa ingh. Asa nu na tanu zong hoihsa mawk ingh.
LK: Amu kha khempeuh in citek mah uh e. Lungdam huaisa mahmah ingh. Ahizong tua la bel a lungleng khat peuh phuah hilel incia! (a la phuakpa min gen nuam lo se).
ZQ: Zogam Labupi a kici MINPHA pen bang hangin Lengtong Pauno ngahsak mawk na hiam? Nang zong lasak leh laphuah a siam mahmah hive cin Pu Lengtong.
LK: Ka piak loh mawk a, aman Zola bek sa thei, Zola bek phuak thei hiven. Ken bel Kawlla lah sa thei, Mangla zong sa thei...
ZQ: Zomi pastor gamdang paipaite vai na ngaihsutna hong gen dih ve.
LK: Gamdang tungsa Zomite pen manglai mangpau theite hi uh hi. Pasian thu a theihnop uleh manglai tawh kigelh Pasian thu pen laibu sung leh Online ah tampi tak om hi, tuate na sim lel uh hen. Zomi pastor ten online a kitam zat theih lohna Zogam leh lai asim thei nai lo ei Zomite lakah Pasian thu ong gen lel le uh hoihsa zaw ingh. Mangkang ten lah amau laka Pasian thugen dingin ei hong sam in um keng.
ZQ: "Inngua hah lo gamgua hah" cih tawh kibang sa sim pian na hive maw!  "Hell om lo himai in teh..." cih tawh kisai na gen ngei khat za veng aw, kician takin nong genkik thei tam.
LK: Aw tuabel hidan hi e. Tulai taka Pasian nasemte khuasakzia ka muh tak teh hihten eite theihloh thusim thei hiin ummawh ingh. Tua thusim pen Hell omloh vai leh Pasian hong pai pak loh ding thu hiding hi aci hing e.
ZQ: Ih paupau leh Awngnandaw a tung ih hi mawk ve Pu Lengtong. Na gim lua hia?
LK: Ko Zangkong ah khualak vak le ung Bus ahih kei leh Taxi vive tawh vak ungh. Khe pai cih pen kilim zat lo hi (hong ciziau se! Haha).
Awngnandaw ka tun uteh Ulun in anne lo a ka kilehkik ding uh hong phal ngiat lo hi. Ak zohuan tawh nitaak an hong vaak phitphet hi. Lungdam ei Ulun.
ZQ: (annek kawmin) Lengtongte  tawh kithuah bel kitai mawk ei!
LK: Lengtong kici khempeuh tawh tuaci sam ken cia.
ZQ: Tulai taka ei Zomite sunga degree minthang mahmah "Doctrate or Doktha boih" a kici pen nang ngaihsutna ah thupi na sa hia leh Pu Lengtong?
LK: Doktha boih bel a thupi himah e. Hih doktha boih ngahte pen hong pil takpi uh henla, thulela aki dong thei miciim ong hi le uh thupi semsem ding hi. Ih Zogam zong hiciang bek dinmun tungin um keng. Doktha ih tam zahin ki khangto sa kei mawk ingh. (Awngnandaw pan ka ciahkik uh hi. Ulun in ko maiah ka taxi sapman uh na pia khin hi. Mipilte bel thusiam mawk ei)
ZQ:  Nang tawh ka kikholh khak pen hampha kisa ingh Pu Kam Khen aw. Na ciamnuih thu thukte Topa'n thupha pia henla Zomi tampi tak khanlawhna hong hi ta hen.....( ka cih kawmkawmin ka taxi uh na paipai a, a zinbuk ka tunkik uteh 8pm na sat phial ta hi. "kimu kik ni" zong kici se lo in "ZANPHA" cih tawh ka kikhen ziau uh hi.)
Lungdam.......
(photo tawh)