Tuesday, January 14, 2014

A3 - veina Zomi Khawmpi Etphatkikpakna by Ngalliam

A tom in Etkikpakna:
A 3-veina LEITUNGBUP ZOMI KHAWMPI
(The 3rd WORLD ZOMI CONVENTION)
By Ngalliam*, Zoland Cottage

THUPATNA

A 3-veina Leitungbup Zomi Khawmpi, Zomi Council, India te makaih siamna tawh Zomite’ Khuapi nunung pen ahi Lamka khuapi ah October 25-27, 2013 sung in nasia takin kibawl hi. India gam ah om inntek Zomi khempeuh, Meiteite, Nagate leh Mizote ban ah Kawlgam pan Zomi Youth Association Dr. Tuanno(ZYA) makai leh khangno gawm mi 225 ban-ah Zomi Congress for Democarcy (ZCD), Global Zomi Association (GZA) makaite, Thusung ding (Resource Person), Thukupbehding (Panelist) leh Biakna lam thugen ding Siate tawh gawm upa 9 in kava uap thei uh hi. Kuan leh ciahna ah Moreh ah escort tawh Pa Lang Khan Pau Guite, Chairman, ADC in hong makai in limtakin hong dawn hong kha in Pa Nang Lian Thang, Custom Director in hong encing lai hi.

Vaitun Organising Committee in hong na muak uh hi. Zintunna, lengla dona leh hun gelna khempeuh ah hicizawdeuh leh cih omlo in picing mahmah uh hi.


1. Vaihawmzia: Zinmangpi in India gam Union Minister te, Manipur State Chief Minister Ibobi Singh leh a lawmte hong paikim uh hi. Inntekpi ahi Minister Pu Phung Za Thang Tonsing, MLA te, Zomi Re-unification Organization (ZRO) makaite, Zomi Council makaipi Pu L.B Sona leh makaite, Khawmpi Thuvaanpi (Convener) Dr. R. Sanga leh Khawmpi Secretary K. Vungh Za Mawi leh a kisam banga vaihawm committee tuamtuamte ahi transport, information & publication, zindo ding cih bangin a semding in akizen mahmah, a tangzang setset, mangpau, zopau namkim a siam mi tampi kiseh dimdiam in diang setset uh hi. Manipur State Government i panpihna leh thapiakna zong a laksiam uh hi.



Deihgeel thusun ding thulu 8, Thusung dingte (Resource Persons), Thukupbehdingte (Panelists), Hunzeekdingte (Moderators), Thumapi thugendingte (Plenary Speech), Biakinn 11 ah nitak sim in thugen ding (Speakers) Pastor minthangte ading a mun sehsa sitset in nakoih khin uh hi. Hunzatna khempeuh dingleh thusun thupi khempeuh pulak khiatna laibu Souvenir pen Chief Editor Siam Za Ding Valte leh editor pawlte in Art paper leh colour tawh page 210 pha laibu limci na bawlkhin sinsen uh hi. Tua laibu ah i Makaite leh Zinmangpite Messages, a phawkhuai hong nusiasa i mipi leh gam hong makaihte thu leh Zogam Galkap Lapi zong kihel kim hi.


2. Deihna Bulpi: Zosuan-te’n Pasian hoihna leh itna phawka Ama’ deihna bang a ‘Kipumkhat, Kimakaih leh Mapankhopna tawh Mailam nawtzawh nading’ lunggulhna hipi pen hi. Thusunna khempeuh ah ei pianzia leh khangthute tel-in mainawt zawh nading ‘Marching On’ cih leh Pasian thu ah nitakin thugente khempeuh in ‘Thupha Ngah Minam Hiding’ (Be a Blessed Nation) bulphuh in gensak ciat uh hi.
Tua ban-ah Zosuante’ lak a kituambawlnate beisak-a ki-itna, lainatna leh pankhawmna khangsakin mailam nawt ding; I tawndan leh ngeinate kem a, tuate zuunna nasep tawh mailam nawt ding; Zosuante’n leitung khantohna a mukha bek hilo in hamphatpihte hihna tawh mailam 2
nawt ding; I gam leitang leh a hauhnate hamphatpih a mailam nawt ding; Zosuante’n leitung pilna, siamna leh teina lama mailam nawt ding leh Zosuante’n eimah kivaihawmna ngahkik a suakta taka khantohna bukim i neihtheihna dinga hanciamna tawh mailam nawt zel ding cihte ngimna leh lametpi thu nam 9 in a kipulakkhia hi.


3. Akibawlzia: October 25 ni zingsang nai 10 akipan in Lamka khua tualpi dim in "Ngeina lahna, Lam leh Siamna Kimuhsakna," nasiatak-a gawmkhopna tawh kihong hi. Hun-ap Thungetna tawh kipan in Convention meilahpi detna, Halleluijah Lapi sakna, Thugenna, Zomi, Meitei, Naga te Lam tuamtuam lahna leh Mizo gam Bawngkawn Pastor Bial Zaipawl, Cardinal Choir leh Kawlpi ZYA Lia leh Taang ten "Zogam Nuam" lapi tawh Zogam hoihna leh nopcitzia lahna lam leh minam kim in eimau lam tek tawh music zui a lamkhop diamdiamna cihbangin sunnung nai khat dong kinei hi. Tualpi dim in mipi tul zakhat taang hong pai hi. Zomi tuamtuam in ngeina puan tuamtuam silhin paak huan limci mahmah tawh kibang in etcim hiallo hi. Announcer te pen pau namkim a siam vive numei, pasalte hi in zaknopsak mahmah uh hi. Khuahun zong nuam – ni lah salo, guah lah zulo, niim dildial in Pasian in thupha tawh hong tuam suk hi.


Sunnung a kipan in October 26 ni bup dongah ‘Zomite’ Phuutding thute, Hongtotote leh Hamphatlawh ziading dante’ (Issues, Challenges And Opportunities of The Zomi) cih thulu tuamtuamte tawh kisai in i Tangthuthei, Thukantel Professor vive in thusung ngiatngiat in Thukupbeh ding mipil kisehte in behlap lai-in zaknop, ciaptehnop leh telnop mahmah hi. Thusun khempeuh ei Zogam thu omzia tawh pansan in khantoh theih nading lamlak vive ahi hi. Mangkang gamkekte in Zogam hong lakcil lai-in i min i puam limtakin eimi sung pan makai omloh manin kipulak khalo in "Kuki-Chin-Lushai" min hong vawh khakna pan un tuni dong tua min i puaksuaknate bangci kheel zawh ding cih akipan Zogam ah ngaihsut thak theih, khantoh nading thupidiakte thu limci kisung hi.


October 27 Nipini in zingsang Biakpiakna Biakinn mun tuamtuam ah kinei tek khit ciangin sunnung in "Pawi Khakna" (Closing Ceremony) YPA Hall ah limtakin kibawl hi. Mangpha khakna Rev. Dr. Pum Za Thang in thungaihsut huai, i hamphat gigena thupha tampi tawh hong tawsawn hi. Hong nusiasa gam makaite daitak a omna tawh phawkna leh uliante in mangpha khak thutom genna a neihciat khit ban uah, Nampi Maicham thunget Rev. Khen P. Tombing in hong makaih hi. Pasian tungah "Mipi Thuumkhawmna" (Litany) Rev. Dr. Luai Cin Thang in hong makaih in lasiamte lasakna tuamtuam tawh lung zuanhuai takin khawmpi khuamui hun in kimansak hi. Nitak in Dinner leh SYO Hall ah Special Zomi Convention Meeting kineih beh hi.
4. Bang Meetna Thupi Kingah: Zosuan-teng in kipumkhat nading 1947 kum akipan a kihanciamnate hangin nidang hun in Lusei ci-a min kivawh khateng in 1967 kum in MIZO cih min tawh na kipumkhat khin lian uh hi. Zomi Convention a 1-veina 1988 kum in Champhai ah kibawl; a 2-veina 1991 kumin Aizawl ah kibawlna huhau in Manipur State a om Zomi Council sungah Simte, Vaiphei, Paite, Zou, Thangkhal, Tedim-Chin, Mate, Gangte leh Komte in ZOMI min tawh na kipumkhat khin lianta uh hi. Tua ban-ah ZOMI leh MIZO cih kammal pen akibang hi a, amasa pen laikam hi in a nunung pen lakam hi cih na kisangthei uh hi. Tu-a a 3-veina pen ZOMI, MIZO pen eipau tawh i minam kilawhkhawmna min adik (true identity) hi cih santheih ciatna pen Convention pan kingah thudik a khatna hi.


A nihna ah, ei Zosuan khempeuh pen kideidan, kituambawl nonlo in pumkhat hihang cih lungsim hong guan in, ki-it, kingaihna leh kinuamtuamna lungsim lianpi hong guan thak hi.


A thumna ah, ei Zomite kipumkhat in i ngeina, tawndan leh kampaute kepcing lohin Kawlgam, Vaigam, Bangladesh gam ah kizep in mangthang khathei ding hihang cih hong phawksak hi.

A lina ah, ei Zogam ah mipil misiam i neihsunte thusunna leh a thukan khiat uh tawh a thu pulak khiat, a laigelhnate uh hangin i tangthu leh i maban ding ah i gamtat nading, thumuh siamna leh khantoh nading tampi kitel beh ahih manin mailam ah mipil, misiam, thumuhsiam gam zuun ding khangno tampi hong pian zawh semsem nading tupnopna lungsim hong khangto sak hi.


A ngana ah, gam it makaite’n limtakin mipi hong makaihzawh semsem theih nading leh mipi in zong makaite nung zuihzawh siam nading kisam hihang cih i muhbeh tektek hi.


A gukna ah, i ngeina puansilh niktente a namkim in hoihthei mahmah, kilawm mahmah ciat ban-ah Zomi bup zattaang ding Zopuanzapi leh dial a na gan khia uh hi.


A sagihna ah, tutunga a kisa late leh akilak Lam a tuamtuamte i muhciang i Zogam pen a ngaihhuai, a zuunhuai, akipahhuai, a angtanhuai Pasian hong piak tenna mun nuam hi gige hi cih hong lunglutsak thak mahmah ka sa hi. Khangnote’ lungsim zong lawng mahmah cih kimu thei hi. Kilem dimdiam a nuntak, khuasak khop ding a manphatna kiphawktek semsem hi.


A giatna ah, Lamka lam ei Zomite inn-le-lo, neih-le-lam in na khangto mahmah uh a, ei Kawlgam zong hong kihongta ahihman i delh zawhding kisam hang cih hong musak hi.


A kuana ah, Mizogam leh Manipur ah om Zomi lak-ah Democracy a kizang zawh sawtkhin zo ahih manin political outlooks kici gam ki-uk thuvaanna leh thu-kikupna ah thumuhzia na sangzaw deuh pah uh hi cih ka mu hi.


A sawmna ah, hih bangin kimuhkhopna, kigawmkhopna, siamna leh khantohna kilahna leh kimuhsakna a hunhun in neihzelna in siamna kihawmsawn in khantohna ciaptehna mualsuang a phut toto gige hihang cih zong hong phawksak hi.


A kipatna leh a tawpna ah Pasian kiang lungdam kohna tawh kibawl ahihman in Christian minam taktak hihang cih kilang hi.


5. Ngaihsuthuai kasak thu nih om: India gam lam ah om Zomi pawlkhat i min atdan ah Zongeina tawh min phuahte zangkhalo in behmin pen minpi in a zang zong na tam hi. A Zo min taktak uh a kitheizo nonlo zong om zawzen kasa hi. Hih beh thupisak luat ciang mikangpau in clanism leh familyism uang uhteh acih uh kaphawk a, hih min atdan ah i Zomi hihna leh i minphuah i a khiatna kilang nonlo ban-ah beh kikal ah kilungnopmawhna a piangsak baih khathei ding cih ka patau sim hi.


Tutung in laigui zawng Thahdo sanggam mipi hong kihello uh a, ki ngaisim giauguau hi.


THUKHUPNA

November 8, 2013 ni in Convention a vaihawmte in Lungdam Kohna (Note of Gratitude) ah hong pulak uh mah bangin i hamphatna, i phawkthakna, i kithutuahnopna lungsim leh i maban hanciam nading i muhthaknate tungtawn in Pasian in "Thupha Ngah Minam Ding" a hong bawlna thei gige in - hanciamna, kuhkalna, kipumkhatna tawh mainawt zel lehang leitungah tuhun ciangin thu-le-la kiza baih, thu kiselcip thei nonlo leh kikhelbaih ahihman i 4
omna ciat pan i gam i lei puah zawh ciat ding ban-ah gam khat ah nikhat ni ciang i kigawmkik baih thei ding hi cih lunggulh in nei in hanciam ciat ni!
A 4-veina Leitungbup Zomi Khawmpi Kawlgam ah a kibawlzawh nading hanciam in thungen ciat ni e.

Takkheh…!!!
Zosuante…
Hanlungciam…
Pasian muang…
Lungkituak…
Mainawt in…
Khangto diam…

* Prof. C. Thang Za Tuan, Ph.D.