Zomi Baptist Hall

The Jubilee - 3: Jubilee Ni

1. Zomi Baptist Hall honna: Joshua in a mipihte kiangah Topa thupha a ngahte uh a gen khit ciangin, "tuni in na biak ding uh teel un" cih tawh zomsuak hi.

Joshua 24:13-15 : "13Note in na seploh uh leitang, na satloh uh khuapite, note tungah kong pia a, tuate sungah na teng uh hi. Na suan'loh uh leenggui lo pan a gah leh oliv huan pan a gah na ne uh hi,’ ci hi. 14“Tua ahih ciangin tu-in Topa zahtak un la, lungsim tak leh thumanna tawh ama na sem un. Na pu na pate un Gun gal leh Egypt gamsungah a biak uh pasian-te koihkhia un la, Topa' na sem un. 15 Topa' na na sepnop kei uh leh, Gun galkhata a na na sepsak uh na pu na pate uh pasian ahi a, note' ten'na gam Amor mite' pasian ahi zongin, a na na sepsak ding peuhpeuh uh tuni-in teel un. Ahih hangin kei leh ka innkuanpihte in ahih leh Topa' na ka sem ding uh hi,” a ci hi."

Kolkata ah Mother Teresa in misi ding lampi gei khawngah kipai, a innkuanpihte'n a sih ding mu ngamlo, pawlkhat ten kihalna ding neilo, pawlkhatte kep taak nawnlo, pawlkhatte in innkuanpih cih zong nei se lo, tua bangte kaikhawm-in inn ah silsiang in lupna tung lumsak in hoihtak, it tak in a kep laigelhpa khat in a muh ciangin, bangci hiam i cih leh, "Pasian khutma ka mu hi" ci hi.

Tua mah bangin ah Zomi Baptist Churches, Mizogam hih ciang i tun, tuni a i hon ding Innpi (Zomi Baptist Hall) pen Pasian khutma hi. Tua man in Pasian inn sung ading, a lamna ding sum leh pai a thawhte, a piate, a tampia, a tawmpia, tul khat, tulsawm, bangzah pia maw cih (ken) kong telloh hangin note tungtawnin Topa Pasian in hih Innpi hong lamsak a, tuni in i pankhop ciangin hihtan hong tung hi. Pasian gam zong i pankhop ciangin zai ding a, kikeklian ding ahih manin tomcik in, "Pasian khutma hi" ciin i pulak nuam hi.

Hih innpi na muh sim in Pasian khutma mu unla, note sepna leh note mimal khutma mu loin, Topa khutma hi ciin ciamteh ni. Banghang hiam cih leh Pasian khutma i cih ciangin Singlamteh ah a kikhenlet khutma hi a, tua a kikhenlet khutma pen Mangmuhna sung i sim ciangin 'Vantung i tun tak ciangin Ama khutma pawn mu ding hi hang' ci hi" (Mangmuhna 1:17).

Pasian khutma pen Singlamteh ah kikilh bek hilo in, tuni nangawn in zong i lak ah om a, i muhtheih in zong hong omsak a, tua mah bangin vantung i tun ciangin zong mulai ding hi hang. Ama khutpawn mu lai ding hi hang. Tua hangin Fanny Crossby in, kum 7 a phak a mittaw, khua mu nawnlo, la dawng tul guk val phuaknu a sih ding kuan in mite in, "Zeisu lim leh mel lah theilo cin a, ko limgelhsiamte gelh a lim mu in nang bangmah mu lo na hih ciang' vantung na tun ciang bangci'n na thei dia?" ci uh hi. Ama'n,

"Mel in thei ning, mel in thei ning,
Ka Honpa tawh ka kituah ciang,
Sik a kikilhna a khutma pawn,
Mel in thei ning"

ciin dawng hi.

Tuni in Pasian khutma (ZOMI BAPTIST HALL) hong thei dinga hong pai u leh naute, nangmah mah zong Pasian khutma hiteh. Hong puahpa in hong puah lai hi. Hong zem lai hi. A kilemlo te hong sui lai hi. Tua manin hih Innpi, Pasian khutma hong dingin i kithawi laitak in, Topa Pasian khutma, Topa Pasian minthanna dingin, tu-in hong ni.

"January ni 8, kum tulnih leh sagih (January 8, 2007) niin keimah J.M. Ngul Khan Pau in Pa PASIAN min, Tapa ZEISU min, Topa Kha Siangtho min tawh ka hong hi" (mipi in tawplo in khutbeng ziahziah).


2. Zomi Baptist Hall apna: Na khutma nong muhsak manin Jehovah Pasian na tungah lungdam thu hong puak ung. Na khutma maban nangmah in hong zopsak in. Leitung a kem a, minamte a kem a, hehpihna tawh hong it hong ngai hong kem Pa Pasian, .... nangma'n na vaang khamlo-a, a tawlnga lo Pasian in, tuni in nangma khutma hong zomto suak a, nangma thupina a kipulakna Inn a suahna dingin nangma minthanna mah, na gam zaina mah, Zeisu sung ka kilam, ka picinna mah uh a suahna dingin hong tan Zeisu min in na khut siangtho sungah kong kemsak uh hi, Topa Pasian aw. AMEN.

Mipi khutbet tawp theilo a, a sak a khang thawn zuazua in, siate, upate, makaite, nupite, etc. mittang pan lungdamna luankhi hong kizui ngelhngelh hi (Topa mai ah bangzah in a etlawm tam!)

3. Jubilee Dak sat: Zomi Innpi (a tomin Zomi Hall zong akici) hon khit ciangin sia Rev. Dr. JM Ngul Khan Pau, General Secretary, Council of Baptist Churches in North-East India (India gama tuiphum pawlpi kipawlna lianpen ci leng theisiam pen ni) in makaih in, a nungah Rev. Gin Lam Thang, Executive Secretary, Zomi Baptist Churches, Mizogam leh a seppihte, a zom ah Rev. Dr. Enn Za Sian, Executive Secretary, Chin Baptist Association, Lamka, Manipur leh a seppihte, tua ciang ordained pastors leh upate, makaite, leh mihonpi in Jubilee zatna ding Biakinn lamah zuisuk uh a, Topa Zeisu Lano tungah tuanga Jerusalem a lutni lo buang dingin tuazah a Zomi lungdama kiko leh Pasian mina kizui ngeetngaat om nailo hi. Topa mina kalsuannate a video i et kik kik ciangin lungdam huai semsem hi.

Biakinn kongtual tun ciang kingak khawm in, kigual dimdem a, ZBC President a sem masate in a banban in Jubilee dak hong sat uh a, 25vei a cin ma tengin upate in hong zomto ngekngek in, a cin tak ciangin papite in Hanla sa in mualsuah uh a, thau lawn in lungdamna tangko ziahziah uh hi. Tua lai a mipi omte mit - a lungdamna kiseelzolo leh a kideek zolo luankhite a kihelh lianlian a hong kalsuan Carson leh Cope topate hang hitakpi dingin ka um hi. Evan. Langh Do Khup in,

Lungdamna khituite a luang dinga,
Kei hong Honpa aw ciin lungdam in la ka sa ding

ana cih mah bangin Pasian a mu taktak, a it taktakte mit ah lungdamna luankhi luang takpi hi. Topa hoih hi.


4. Halleluijah Lapi kisa ziahziah: Biakinn sung lut in, ZBC gamsung khangno khempeuh in mipi mai ah dingin HALLELUIJAH LAPI (Halleluijah Chorus by Hendel) hong sa uh a, Topa Pasian pen phattaak mah si e maw.....

Zomi khempeuh Pasian phatna pawipi ah ZBC Khangnote zong kihel kha uh hi zen leh a khatna a ngah kei uh leh zong a tawpna bel hi in um kei ing. Topa hoih a, nuntakna nei khempeuh in phat ding kilawm takpi hi.

5. ZBC hong kipat dan genna: Upa Chin Za Khup, Aizawl in Mizogam ah ZBC a kipatna Hiangmun ah a pat dan uh hong gen a, a kidek zawhloh hun om mah leh a gennop pelh hetlo in a haksat dan, mi kawmkal ah nopmawh a sak dan uh (a kipatciil in), sum leh pai a omloh dan, sia ding a om loh dan, makai ding a om loh dan, etc.... kicingtak in hong gen dik dek a, mipi lak ah zong a kidek zolo om veve hi. Lungdamna vive tawh hih ni kizanga, a lianpen pan a neupen tanin lungdamna ki ipcip lo hi. A kap utte kap, a nui utte nui hi. Hih zah a suakta, hihzah a nuam ding sa leeng sawtpek in Golden Jubilee kizangta ding hi cih ka um hi. [Upa pa thugen leh a pulak thute pawlkhat Silver Jubilee Souvenir ah kisuaksak hi].

6. Thugenna: Siapa Rev. Dr. JM Ngul Khan Pau in Mizogam sunga om Zomi te khempeuh leh ZBC tungah a khut mahmah nga a THUPHA pia in, Innpi mahmah zong ama khut teekteek tawh lawnga hong in, Topa sathaunilh ama khutte lamto a Topa kiangah hong ap khit ciangin tuni hun a mundang khat ah hunzang ding kim lai, a program omsa nusia in Zomi te adingin Guwahati pan hong hong pai vingveng in gim leh tawl phamawh salo, vuikhu, meikhu thuak ngam in hong paina thu a kizak ciangin Pasian tapa Zeisu tanghial in zong, "Israel mite gum dingin hong pai masa ka hi Canaan numei aw..." acih tawh hong kibang si e, ka lungsim in ka ci hi. Topa hoih si e.

Hih ciang ciang i tun theihna pen Topa hong makaihna hang hi.... cih pan, Jubilee i cih.... Mizogam ZBC thu leh la tuamtuam, Pawlpi report tuamtuam leh Lai Siangtho siksan a thugenna te zawh ciangin (a kicingzaw in a kisap leh mai lam ah), nupi papi numei naupang mihonpi in lungdamna khutte lamto in Topa mai ah LUNGDAM KOHNA HUN kizanga, mihon thunget khit ciangin Jubilee a zo mahmah kibang in lungkim heha ta hi. Ebenezar!!

7. Tawpna Phatna: Topa hoih hi, Topa lian hi; Hun hoih hun nuam hong musak; Na kilawm hi Topa na kilawm hi, Phat dingin na kilawm hi ..... cihte sa a, nupi papi pulpit mai ah Calvary lam ngai a khutte lamto a a lam diaidiai tak uh ciangin Khuangpi tumte lah kinawh pah, Khuangneu tumte lah kinawh pah, Guitar tumte leh tumging tum FALCON BAND, Yangon te zong kinawh pah in, Biakinn sung khempeuh "Halleluijah" ci a Topa phatna tawh kidim in, vuikhu dektak zo liang hi.

Hih bang ni kimu kik nawnlo ding, eiteng li liai buang in!

Siapa' Topa Thupha Piakna tawh hunte kizo in, Jubilee Ni a kizang khin hi hiau! Kikleh Ni a nei diam.... ZBC Silver Jubilee Ni in....?

(zop lai ding)


Hau Za Cin
Phuitong Liim